@Sh_BentMaher

شيماء الشافعي

Ask @Sh_BentMaher

Sort by:

LatestTop

مبحبش اتكلم فيديو كول كتير وخطيبي بيضايق مني بسبب الحوار دا اعمل ايه و دا وسيلة تواصلنا الوحيد لانه مسافر

طيب هو أنا جاوبت سؤالك دا امبارح بس لما قرأت الإجابة تاني شايفاها ناقصة
إجابة سؤالك بيكون لها شقين : الشق الأول إن التواصل الكتير دا بيكون فيه مشكلة ، لأن حد أنا وهو بنتكلم مع بعض كل يوم أو باستمرار ، فغالبا حيحصل تجاوز لحدود الخطبة ، وعشان كدا جاوبتك بالإجابة اللي تحت
الجزء اللي أنا كان لازم أكمله : إن لو كنتم عاقدين - مكتوب كتابكم يعني - هل كنت حتبقي متضايقة بردو من الفيديو كول ، ولا المشكلة عندك بس في نقطة إنها خطوبة فقط ؟
عشان لو مشكلتك إنها خطوبة بس : تمام
أما لو المشكلة هي عندك في التواصل حتى لو هو زوجك : يبقى ساعتها تفكري ليه متضايقة بالضبط ؟ إيه السبب يعني أو بتحسي بإيه يضايقك
وتشوفي إزاي تعالجيه
ليه تعالجي السبب ، ومش خطيبك اللي يتفهم؟ عشان دا زواج وهو متغرب فشيء طبيعي يتواصل معاكي كتير باللي متاح
وأي علاقة مهما كان نوعها بين اتنين بني ءادمين ، فكل طرف بيضحي براحته في أمور قصاد إنها تكون علاقة جيدة ، سواء صداقة أو قرابة أو زواج....وهكذا
دا الشق اللي ما كتبتوش امبارح.
وربنا يصلح لك الحال.
............................
صباح الخير 🌸
على حسب فهمي لسؤالك إن مشكلتك هي: إنه عاوزك تتكلموا كتير - لأن الفيديو كول ما يفرقش عن الزيارة الأسبوعية
طيب تعملي إيه ؟
تروحي تسألي شيخ هل دا يجوز أصلا أو لأ؟
لأن مش معنى إن مفيش قعاد بالأجساد ، إن نفتح بأه في الكلام براحتنا كل يوم كأنه كتب كتاب مش خطوبة لسه!
واللي الشيخ يفتيكي بيه اعمليه، وساعتها تفهميه بهدوء ، وتدعي إنه يقبل عادي.
ربنا يقدر لك الخير.

View more

بحس كل البشر مركزة معايا اعمل ايه عشان اتجاوز الشعور ده؟

انشغلي
أول لما تنشغلي مش حيفرق معاكي ، حتى لو مركزين فعلا مش بيتهيألك.

جماعة الاقى فين بنت عندها حياء فى كلامها قبل لبسها .فاهمه يعنى ايه غيرة رجل لما يقولها مينفعش افراح فى قاعات .بتعرف تقول حاضر .ومش عنيده .ومنظمه ونشيطه ونضيفه وصاحبة رأى وحكمة وروحها حلوة ف البيت. الناس اللى هترد وانت بقى فيك ايه علشان تطلب ده .متردوش .السؤال مش ليكم .انا عندى حجات كويسه كتير

فين بنت عندها حياء في كلامها قبل لبسها ؟
في المسجد
الواحد لما بيغيب عن المساجد وصحبة الأخوات فترة ، بيتخيل إن الدنيا ما عادش فيها اللي هو اتعلمه زمان
لغاية أما ييجي رمضان ونشوف البنات اللي كانوا صغيرين وكبروا قصادنا في المسجد ، ونعرف إن الدنيا مش وحشة زي ما بيتهيألنا!
ولكن
تربية المساجد ، اللي بتستحي، هي وأهلها مش حيرضوا بحد إلا لما يكون شبهها
يعني: اللي طالب واحدة بتستحي ، لازم يكون هو كمان كدا
فلو مش كدا ، يصلح نفسه عشان يبقى كدا ، لله قبل ما يكون عشان يتوافق عليه.
أما بالنسبة لباقي المتطلبات فدي بتتعرف في فترة الخطوبة والعقد وزيارات النساء لبعضها
ومدى قابلية الطرفين إنهم يحسنوا من نفسهم عشان يتقابلوا في منطقة اتفاق - لأن لازم في خلل
ومعلش في اللي حقوله: تفصيص المواصفات دا تفكير أنثوي ، وبيُنتقد كمان
لأن الواحد ما بيروحش يفصل إنسان على مقاسه عند الخياط ، وإنما بيطلب إنسان كويس ومناسب في النواحي العامة ، بعدين لما يشوفه يقرر هل هو مناسب وحقدر أكمل معاه برغم الأمور اللي مش عاجباني عنده ؟ ولا شكرا جدا وربنا ييسر لك حد يناسبك وأشوف غيره ؟
وكلامي مش معناه حصر الخير في بنات المساجد فقط ، أو إنهم ملايكة
ولكن الدين والتنشئة عليه بيفرق ، شئنا أم أبينا ، وتسأل الله الخير.

View more

Related users

اي المواضيع الي بتتقال في رقيه الشرعيه ضروري بجد 🙆 وازاي نبدأ الكلام أو نبدأ ب اي 🙆🙆

😁 اسمها رؤية مش رقية
الرقية دي اللي بنرقي بيها المريض عشان يتعافى
لكن جلسة الخطوبة اسمها : رؤية - جاي يتعرف عليكم ويراكي يعني :))
هو اللي بيبدأ الكلام مش إنت ، أو والدك في البداية
وسيبي العملية تمشي طبيعي والكلام يجيب بعضه - لإن هو مش حيدخل بيتكم إلا لو عندك حد أدنى من المعلومات الأساسية عنه ، وموافقة عليها
بعد المرة الأولى لو في حاجات عاوزه تسألي عنها، وحصل قبول مبدئي عند الطرفين ، يبقى تاني مرة ييجي : اسألي عن اللي عاوزاه ، بس بطريقة كويسة - تسألي مش تحققي
وما تنسيش الاستخارة
ربنا يقدر لك الخير.

اي احسن بنك ف التعاملات ويكون سهل ف التعامل ع اي ابلكيشن؟

السؤال بيكون : إيه البنك اللي معاملاته حلال ويجوز إني أضع فيه مالي ؟
عشان الربا اللي بيحصل في البنوك من أكبر الكبائر.
الله يكفيني وإياكي والمسلمين بحلاله عن حرامه.

هو لو فاتتني صلاة وليكن العصر والمغرب اذن اصلي انهي الأول؟

اللي أعلمه : تصلي العصر الأول وبعدين المغرب
طيب لو فيه ناس بتصلي جماعة وعاوزه أدخل معاهم ؟
صلي المغرب معاهم وبعدين العصر.

ازاي الراجل الكويس في وقت الزعل بيبان ف علاقتنا دي ؟

هو إنت نفس اللي جاوبت آخر سؤال ليها ولا حد تاني ؟ :)
بصي : حقولك أمور تفكري فيهم ، وحتلاقي إجابتك بنفسك:
الأمر الأول : الإنسان مش موقف وقت زعل أو فرح، وإنما مواقف وطريقة حياة عامة
طيب ليه بنبص عليه وقت الغضب ؟ عشان بيبان جزء من أخلاقه من غير أي تمثيل - لو هو حد مش تلقائي يعني
وساعتها بنقرر هل غضبه في الحدود الطبيعية ، ولا الموضوع ما كانش يستاهل وهو بيأفور؟
وهل غضبه دا أنا أقدر أتحمله قصاد المميزات التانية ؟ ولا لأ والله متشكرة جدا ، وربنا ييسر لك حد يناسبك .
الأمر التاني: إنت قالب لوحدك ، لا شيماء ولا أختك اللي متربية معاكي في نفس البيت
يعني إيه ؟
يعني كلامي وكلام أي حد حينصحك ، هو كلام تسمعيه وتفكري فيه ، لكن مش شرط يكون يناسبك بسبب عوامل كتير جدا : أهمها اختلاف شخصيتنا وتقبلنا ونظرتنا للأمور.
أنا شفت اللي زوجها بيطول لسانه وإيده وقت الغضب ، وهي شايفه إن دا عادي ، بينما واحدة تانية لو شتمها أو مد إيده عليها حترد عليه غلطه بنفس الطريقة - فمش كل الناس زي بعض.
الأمر التالت ودا مهم جدا : مين الميزان أو المرجع للأخلاق المنضبطة تماما ، تماما بمعنى الكلمة من غير إفراط أو تفريط ؟
سيد الأولين والآخرين نبينا محمد صلى الله عليه وعلى آله وصحبه وسلم
بقولك دا عشان حتشوفي ناس بتبرر لأفعالها وبتستدل بفعل بعض الصحابة - رضوان الله على الصحابة أجمعين
فالميزان عندك اللي تعرفي بيه مدى قرب الشخص من الصح أو الخطأ : هو فِعل النبي صلى الله عليه وسلم وتعاملاته.
الأمر الأخير : زي ما إنت الوحيدة اللي تقدري تقرري إيه اللي يناسبك وتتحمليه ، ففي نفس الوقت إنت بتراعي الفرص المتاحة ليكي ، وإن الناس كلها فيها عيوب ، ومفيش حد بياخد التورتة كاملة ، وهل الخطأ في تراجع عنه أو لأ ، وهل فيه احترام ما بينكما عموما وقصاد الناس خصوصا أو لأ؟
وطبعا تستخيري وتسألي ربك يقدر لك الخير.
ءامين.

View more

هو طبيعي الراجل يعني خطيبي فضل اكتر من ساعه ونص يكلمني عن اهميه تعليم أمور البيت والطبخ والخبيز واني اتعلم ده عشان عيالي بعدين يعني وكل ما يجي فرصة يقولي اتعلمي ( مع أن عادي أنا عارفه الحجات دي ) دي عادي ف الرجالة ولا فضي شوية ؟!

ليه ساعة ونص ؟! إنت كنت بتقاوحي معاه ؟!
عموما : بسبب الكلام المنتشر على مواقع التواصل وبسبب الحالة المادية المتردية للشباب ، فممكن نقول إنه بيتكلم كل دا عشان يوصل لك رسالة : إنه حيهتم بشغل برا ، وإنت حتهتمي بجوا
ورأيي كان من أول ما بدأ يتكلم ، إنك كنت تطمنيه وتردي إنك متفهمة إن المرأة بتبذل ما تستطيعه ، وإنك بتعرفي تطبخي وتهتمي بأمور البيت عادي ، ولو حصل تقصير فشيء طبيعي عشان جديدة على تحمل مسؤولية بيت كامل لوحدك ، بس بحسن العشرة والصبر والتغافل : الدنيا بتمشي وتتحسن بمرور الوقت.
لو اتكلم تاني في الأمر دا ، ساعتها تسأليه صراحة ليه بيثير الموضوع دا كتير ويطيل فيه ؟
وجزاك الله خيرا على حسن ظنك وسؤالي، ولو حابه تسألي تاني فبعد رمضان إن شاء الله ، إذا ربنا أحيانا.
الله يقدر لك الخير ويمن علينا والمسلمين بالعتق من النار.

هوا انا الي مبحبش اتسحر ولاا كل الناس كدا

God65950’s Profile Photomira
مش لازم تتسحري حاجة تقيلة ، ممكن مايه بس ، ونعم سحور المؤمن التمر
ولو عشان الصحيان : احتسبي إن السحور سنة عن النبي صلى الله عليه وسلم ، وإن الله عز وجل وملائكته يُصلون على المتسحرين
ويمكن تدعي دعوة في الوقت دا فتستجاب ، فتسعدي في الدنيا والآخرة
ربنا ييسر لك ويتقبل.
Liked by: mira

هو ايه حوار ان واحدة تقول لأهلها عايزة أنتقب يقولولها لما تجوزي!!؟؟؟؟؟

عشان الأهل بيبقوا متخيلين إن النقاب حيمنع زواجك ، لإن مفيش واحد حيتقدم لواحدة وهو مش عارف شكلها
كإنهم مثلا مش بيروحوا يتقدموا وتبقى مش محجبة أصلا، وما يتفقوش ، وكل واحد يروح لحاله عادي !
بس ما علينا
طيب تعملي إيه ؟
تقنعيهم إن مش هو اللي بيمنع رزق ربنا ، واصبري عليهم لأنهم في الأول والآخر عاوزين مصلحتك حتى لو بيفكروا غلط ، والزن كتير
وطبعا الدعاء وصدق الرغبة
إحداهن حكت لي رفض والدها القاطع لنقابها ، بعدين ربنا فتح عليها إنها تدعي باسمه القهار في السجود إنه يقهر قلب والدها على تقبله ، فلعل دعاها صادف وقت إجابة ، فلبسته وأبوها ما اعترضش بعد سنين رفض.
يسر الله لك طاعاته وتقبلها منك.

انا روحت كنيسه وولعت شمع معاهم ووقفت قدام الإله بتاعهم واتمنيت امنيات والبابا بتاعهم حط أيده علي راسي ورقاني هل حرام ياريت كله يرد بالله عليكم

هو دا حرام ؟
دا مش حرام واحد ، دا حرامين تلاته ، وثمانون حراما بالتمييز يا بت :)
وحدي الله
لا إله إلا الله.
لو إنت في مكان وناس عماله تشتم في أمك أو أبوكي ، هل حتروحي تشاركيهم وتحترميهم وتفرحي بعطاياهم ؟
أكيد لأ
طيب هم بينسبوا لربك الصاحبة والولد - تعالى ربنا عما يقولون علوا كبيرا - وبيكذبوا نبيك صلى الله عليه وسلم ، وإنت رايحة تشاركيهم في شعائرهم
فهل أبوكي وأمك أغلى عندك من ربك ونبيك ؟!
اللي بيعمل اللي عملتيه دا غالبا بيكون حاجة من تلاته : إما إنه بيجامل صحابه ، والمسكين مش عارف إنه بيجامل على حساب دينه وبيسحب من رصيد تعظيمه لربه
أو إنها حد مضحوك عليها بإن القساوسة بيفكوا السحر ، فبتروح المسكينة ترجو عندهم أن يفرجوا عنها - ولو كدا هي محتاجة تسأل هل بفعلها كفرت بالله أم لا ؟
أو حد مش مستقر في دينه ، فبيجرب في كل حتة شوية - بس سؤالك يدل إنك مش الحد دا
فتواصلي مع شيخ ضروري تستفتيه ، وما تعمليش كدا تاني أبدا ، إذا كنت رضيتي بالله ربا وبالإسلام دينا وبمحمد صلى الله عليه وسلم نبيا.
طبعا أنا اتكلمت على المهم في الموضوع وما جيتش ناحية إن الراجل اللي يحط إيده على راسك وهو مش من محارمك : إيده ما ترجعلوش ، بس إنت اللي سمحتي بدا.
ربنا يردك لدينه مردا جميلا ويثبتك عليه ويصلح حالك.

View more

اقول ايه اول ما شخص يتقدم وشرطه انك مش تشتغل ومن غير ما يقنعك او حتى يتكلم شرط اساس مفيش شغل 🙄

ما هو اتكلم وقال : شرط أساسي عندي مفيش شغل :)
كتر خيره إنه واضح ، وكتر خيره إنه حيقوم بواجبه ومش عاوز زوجته تنزل تتبهدل في مواصلات وشغل وقرف مهما كانت حالتها النفسية والجسدية
وافقتي ؟ خير
مش موافقة ؟ ارفضيه ، وربنا يخلفكما خيرا.

الدعاء بيغير القدر؟!

هل الدعاء يرد القضاء ؟
آه ، في حديث للنبي صلى الله عليه وسلم بيقول فيه كدا
طيب إزاي دا يتوافق مع حديث إن الله كتب مقادير الخلائق ، وجف القلم بما هو كائن؟
ندرس عقيدة عند حد نثق في ديانته ونتعلم
لكن
اللي مهم نتعلمه : إن لو رغب الإنسان في شيء يبقى يسأل ربه ، ويحسن الظن به إنه حيعطيه سؤله
طيب لو ما أخدش اللي هو عاوزه؟
فغير إن الدعاء عبادة ، فهو تجارة رابحة ، إما تُعطى مسألتك ، أو يُصرف عنك من السوء مثلها ، أو يدخر لك يوم القيامة
فترضى وتُسلّم
وما تستخدمش القدر وتتحجج بيه في عدم أخذك بالأسباب أو فعل المعاصي.

بتحفظوا القرآن ازاي؟ بحيث متنسوش اللي حفظتوه...

ayyamohammed505’s Profile Photoآية محمد
هو السؤال عن بتحفظيه اصلا إزاي ؟ ولا بتراجعيه عشان ما تنسيش ؟
تحفظيه أصلا بالالتحاق بحلقة على أرض الواقع أو على النت لو مش متيسر - عشان ما تحفظيش غلط
القاعدة الأساسية للحافظ : كم قليل -حفظ ممتاز ، يعني تقللي الكم اللي بتحفظيه وتكرريه كتير لغاية أما يبقى مفيش فيه ولا غلطة
تثبتيه إزاي ؟ كترة السماع للشيوخ المتقنين ، الصلاة به ، ورد مراجعة ثابت
وأولا وأخيرا طبعا : الدعاء.
يسر الله لك حفظ كتابه وجعلني وإياك من أهله.
Liked by: آية محمد

انا حقيقي في أشد الحاجة لحد ياخدني ويقعدني في بيئة إيمانية ! نقعد فترة في المسجد ننعزل فيه عن الناس وعن السوشيال و عن أي شيء يغضب ربنا و الإكتفاء بصحبة صالحة لا يشقي في صُحبَتِهم احد مش بنعمل حاجة غير اننا بنتدارس آيات القرءان و بنتكلم عن ربنا و نشحن قلوبنا من تاني عشان نقدر نواجه الدنيا و الفتن

fatoma____aa’s Profile PhotoFatma
أكتر حد حيحس بالكلام دا ويفهمه اللي كان عايش في دا قبل مواقع التواصل وقبل 2013 - ربنا يفرجها من عنده
بس عموما : فين ممكن تلاقي بيئة شبيهة بدا حاليا ؟
المسجد في رمضان - ربنا يبلغنا على ما يرضيه
يعني : احرصي إنك تروحي المسجد في رمضان ، وتصلي العشا والتراويح ، ولو وليك يأذن إنك تقعدي للتهجد وما كانش فيه مشكلة ممكن تتعرضي لها في الشارع لما ترجعي بيتك قرب الفجر : اعملي دا
ومش لازم صحبة صالحة لا يشقى في صحبتها أحد لأن مفيش كدا ، إحنا في الأول والآخر كلنا بشر وعندنا عيوب ، عشان لما تروحي المسجد حتلاقي تصرفات تضايق كعادة التجمعات النسائية ، فتكبري دماغك وتصبري احتراما للمكان اللي إنت فيه وعشان إنت رايحة تنضفي قلبك من السواد بتاع طول السنة مش تزودي عليه.
معاكي مصحفك ولو فيه هامش تفسيري يبقى خير
صلي ، واقرئي قرءان ، وخلي عندك ورد أذكار ، وسلي ربك في بيته إنه يحبب إليك الإيمان ويزينه في قلبك ، ويصلح دينك ودنياك وآخرتك ، ولا يخرجك من بيته ولا من الشهر إلا بقلب سليم ، ويمن عليك بالصحبة الصالحة.
يسر الله لك الخير.

View more

رأيك اي في الزواج من محافظة تانية؟

أنا مش من أنصار إن الزواج يبقى فيه سفر، عشان كل لما تعوزي تشوفي أهلك حتحتاجي محرم يودي ويجيب
إلا لو كان الخاطب شغال في محافظتك ومستقر فيها ، أو قلة فرص زواجك أو إن الخاطب ما يجيش زيه
ودا رأي شخصي مش شرط يكون صح ، بس بلفت نظرك لنقطة المحرم في سفر المرأة.

بعد الكشوفات والتحاليل اكتشفت ان عندي كانسر في الدم الحمد لله على كل حال محدش في البيت يعرف حاجه عن الموضوع مش عارفه اعمل ايه ومش عاوزه حد يعرف ومش عارفه إيه الخطوة الجايه إللي لازم اعملها 💔

لأني لا أتخيل إن حد ممكن يقول على نفسه كدا وهو غير صادق
فأسأل الله العظيم رب العرش العظيم أن يشفيكي ويبدلك دما خيرا من دمك ويمسح عليك بيمينه الشافية
بس يعني إيه مش عاوزه حد يعرف ؟
إن عاجلا أو ءاجلا حيعرفوا ، وعشان تبتدي في سكة العلاج بدل لما الموضوع يزيد - لا قدر الله
الأهل والصحاب مش بنعرفهم ويعرفونا بس وقت الحلو يا حبيبتي ، عشان لو كدا مين اللي يكون جنبك وقت الحاجة؟
مهديلهم الأول واتكلمي عن الرضا بالبلاء ، وهم لما يلاقوكي ثابتة ، وقع الموضوع حيكون أخف عليهم.
عافاكي الله ومرضى المسلمين وصرف عنك كل سوء
طهور إن شاء الله.

اللهم في ليلة النصف من شعبان اغفر ذنوبنا واستر عيوبنا وحقق آمالنا وارض عنا واشف مريضنا وارحم امواتنا💚🌹

وفرج عن إخواننا
اللهم استجب

لو مكنتش بصلى طول السنين ال فاتت دى وكنت بنقل كلام بين كل ودا وبدأت صلاه من دلوقتى وتوبت عن كل ال عملته هل ربنا ممكن يغفرلى ويتقبل توبتى؟! حاسه لو موت قريب هدخل النار بسبب ال عملته

هل ممكن ربنا يغفر ويقبل توبتك ؟
آه ، ربنا تواب غفور رحيم ، يفرح بتوبة عبده إليه ، فهنيئا لك
فنحسن الظن بالله ونرجو إنه حيغفر لك ويتقبل توبتك
بس خلينا نتفق على أمرين :
الأول : بالنسبة للصلاة : صلي كل الفروض الوقت بوقته واحرصي جدا على دا ، مع الدعاء في السجود إن ربنا يعينك على أداء الصلاة ويثبتك عليها ويتقبلها منك
ولو فاتك فرض : عوضيه في ساعتها واستغفري كتير عشان يفضل جواكي تعظيم قدر الصلاة
وبعد فترة لما تثبتي - قولي ست شهور كدا لسنة - وتبقي مش بتضيعي ولا فرض ولا بتخرجيه عن وقته : ابتدي صلي مع كل فرض واحد تاني من اللي عدّوا وما صليتيهمش ، واستمري على كدا لغاية أما تظني إنك خلصتي السنين اللي عليكي.
الأمر التاني: بالنسبة لنقل الكلام : استغفري للطرفين ، مع إنك وإنت قاعدة مع ناس من اللي كنت بتنقلي ليهم الكلام ، هاني سيرة اللي نقلتي عنهم وامدحيهم وصلحي العلاقات وإنك يعني اللي فهمتي غلط وربنا يسامحني ودي طلعت بتحبكم .....وكدا
وبردو استغفري وتصدقي عنهم
وربنا يقبل توبتك ويغفر لك ويثبتك على ما يرضيه.

View more

جماعه مره حد قالى ان ماخدتش الحاجات اللي انا عايزاها عشان انا لسه مش مناسبه ليها. يعني متقبلتش ف الشغل اللي قدمت فيه عشان انا لسه محتاجة ابقي احسن ..مش عارفه ابقي ف علاقة عشان انا شخصيتي لسه محتاجة تبقي افضل وهكذا. الحقيقة ان كنت مقتنعه بكل دا ،لكن عمري بيعدي ومفيش حاجه بتحصل !

عشان الكلام دا بيتقال تصبير مش أكتر !
يعني الصح : إنت ما أخدتيش الحاجة اللي إنت عايزاها عشان مش لازم مادام عوزتيها يبقى تاخديها ، وممكن تكون مش نصيبك عادي
تدعي وتبذلي الأسباب اللي في وسعك واللي منها تحسني من نفسك، تمام
لكن مش شرط بعد دا تجيلك
طيب إيه اللي يخليكي ما تزعليش لما ما تحصليش عليها ؟
حسن ظنك بربك، وتقولي لنفسك قول ربك : (وعسى أن تحبوا شيئا وهو شر لكم والله يعلم وأنتم لا تعلمون) وقول النبي صلى الله عليه وسلم : عجبا لأمر المؤمن ، إن أمره كله له خير ، إن أصابته سراء شكر فكان خيرا له ، وإن أصابته ضراء صبر فكان خيرا له.
وما توقفيش حياتك على انتظار شيء أو شخص عشان ما ترجعيش تندمي.
قدر الله لك الخير وأرضاكي به.

تعالو نبعد شويه عن هموم الدنيا ونصلي ع النبي اللي هيشفعلنا يوم القيامة 🤍

صلى الله على النبي وعلى آله وصحبه وسلم تسليما كثيرا.

نفسي لما اقول لحد إني شامم ريحة رمضان يفهمني ويشمها معايا انت ازاي يالا يا معدوم حاسة الشم عايش ازاي مش شامم ريحة رمضان طب ريحة فرحة رمضان طيب

mnynasr43’s Profile PhotoMoon (。◕‿◕。)➜
والله يعني الواحد كان بيتنسمها وينتظرها من قبل رجب
بس أظن السنة دي الأنوف مزكومة بريحة الدم والخذلان والحقارة اللي عمرنا ما تخيلناها!
من ٢٠١١ وكل فتنة تيجي نقول عمرنا ما كنا نتخيل ، لغاية أما تيجي اللي بعدها ترققها.
وإذا أردت بعبادك فتنة فاقبضنا إليك غير مفتونين ، وأحينا ما علمت الحياة خيرا لنا وتوفنا ما علمت الوفاة خيرا لنا.

+ 1 💬 message

read all

وحدة صحبتي لسه متجوز من قريب وقالت ليا أنها هتطلق عايز اساعدها بحيث ماتعنيش زي صحبتي التانية أنا عرفه أنها محتاسه ومكابره مش عايزه تبين وخلاص لأنها اتطلقت فبنسكت ونواسي لكن دي لسه جديدة صعبانه عليا اوي اقولها ايه يقنعها حد عنده فكرة ازاي اميلها لعدم الطلاق واحببها بالاستمرا؟

هي مشاعرك دي طيبة ، جزاك الله خيرا
بس يمكن هي عندها أسبابها ، والاستمرار مش بالعافية
بصي : لما صديقة بتفكر تطلق ، والعلاقة بيني وبينها تسمح لي أتكلم معاها في الموضوع دا ، بحاول أفهم أسبابها وأبص من وجهة نظرها هي - بتتقمصي شخصيتها يعني عشان تتفهمي أسبابها وما تبصيش من وجهة نظرك إنت لأن الناس مختلفين - وأحاول ألاقي حلول بحيث أتفق معاها إنها لو انفصلت تبقى مش ندمانة لأنها استنفذت كل الحلول وعندها القدرة على تحمل العواقب مهما كانت
طيب وصلنا خلاص لنقطة الانفصال ؟
يبقى تفضلي جنبها - ما تشجعيهاش على اللي بتعمله ولكن تصبري بس - وتقوليلها إن العلاقات بلاء ، يبتلينا الله بها عشان يشوفنا حنعمل فيها إيه ، وحنتقيه ولا لأ - والمعنى دا مهم التذكير بيه عشان المظالم اللي بتحصل في الحقوق والتشهير وقت الانفصال من الطرفين - طبعا مفيش ملايكة بس التذكير لعله يحد شوية من المشاكل وعشان لو اتظلمت تتصبر بيوم : وإن كان مثقال حبة من خردل أتينا بها وكفى بنا حاسبين.
مع تفهم منك لألمها ، لأن حتى الزوج لو كان بني ءادم مقرف ، فيظل الطلاق كسر للمرأة ولو بسبب أملها اللي راح في حياة مستقرة.
وادعيلها ربنا يصلح لها الحال ويهديها لأرشد أمرها.
جزاك الله خيرا.

View more

+ 4 💬 messages

read all

- إن القلبَ ليُظلِمُ من أتْعابِ الحَياة فيستنِيرُ بكثرةِ الصَّلاةِ على النَّبيِّ ﷺ

اللهم صل وسلم وبارك على نبينا وسيدنا محمد وعلى آله وصحبه .

Next

Language: English