تفتكروا ايه الحكمة من اننا نقابل ناس مش من نصيبنا ؟

July 26, 2024

هم ناس زي أي ناس
ولكن تصرفك إنت اللي بيخليهم مختلفين عن غيرهم ، خصوصا لما تحطي توقعات مش مبنية على أي خطوة واضحة محترمة اتعملت
ولكن على أوهام أو وعود زي كلام الليل اللي مدهون زبدة
فلما سقف التوقعات يقع علينا ، بدل لما نفهم إن دا كان غلطنا من الأول ، نلزقها في النصيب والقدر ونلومهم ونقعد ندور على حكمة!

بس أنا والله ماشية صح والناس دي دخلت بيتي بس أساءت ليا ؟
يبقى بلاء ، وجعلنا بعضكم لبعض فتنة
أتصبرون؟
وكان ربك بصيرا
والبلاء بييجي عشان يمحصك ، فحتصبري عليه ، فإما يكفر عنك سيئات أو يرفعك درجات.
ويخلفك الله - إن شاء الله - خيرا منهم.

صاحبتي جدتها توفت الاسبوع اللي فات وكنت عايزة اعزمها علي فرح اختي من باب الذوق عشان متضايقش اني معزمتهاش، اعزمها امتي من رايكوا

July 26, 2024

لو الفرح مفيش فيه مخالفات شرعية : كلميها اسألي عليها ، وأخبارها هي وأهلها ، وبعدين احكي عن أخبارك ، وقوليلها في وسط الكلام : دا فرح أختي يوم كذا ، أنا طبعا أتمنى تكوني موجودة ، بس لو مش حتقدري عشان الظرف اللي عندك ، فكأنك جيتي يا حبيبتي
وطبطي عليها بإنها لو حزينة فإنت متفهمة دا وادعي لجدتها ربنا يرحمها.

مش عارفه أتخطى اني اترفضت من عريس 😅

July 26, 2024

حتزعلي شوية في الأول ، بعدين حتكتشفي إنك بترفضي وبتترفضي عادي
وبعدين حتبقي إنت عاوزه اللي تترفضي عشان تريحي دماغك من التفكير إن كان مناسب ولا لأ ، وما حدش يضغط عليكي :))
ما تزعليش ، ربنا يخلفك خيرا.

كيف تتعامل مع الأشخاص الحقودين؟

July 26, 2024

لو حنقف عند كل واحد من الحثالة اللي بنشوفهم في حياتنا : يبقى مش حتتحركي من مكانك خطوة واحدة
رأيي الثابت : مادام حد أنا مش مضطرة أتعامل معاه ، وهو أو هي الحقد واكل قلبهم ، ما تجازفيش وتملي قلبك سواد بالتعامل معاهم
تزبليهم ، وربنا يعينهم على بلاءهم.

السلام عليكم ورحمة الله وبركاته انا بحب انزل بميكب خفيف عشان ابان احلي بس كارهه دا اوي وحاسه انه ذنب معطل عني حاجات كتير اوي عاوزة ابطل احطه بس بحس ان بشرتي باهته ونظرات اللي حواليا بتتعبني اتغلب ع ده ازاي بدون تجريح انا عاوزة استغني عن كل متاع الدنيا لأجل ربنا بس بضعف وارجع 💔

July 24, 2024

وعليكم السلام ورحمة الله وبركاته
بصي يا أختي : إنت الدنيا ملخبطة عندك شوية ، فخلينا نضبطها
مش مطلوب منك تستغني عن كل متاع الدنيا ولا شيء
لأ
استمتعي واتبسطي عادي ، وربنا جميل يحب الجمال ويحب إن عبده يتنعم بنعمه ويعبده بقلب شاكر راضي
تمام كدا ؟
عارفة لما يكون عندك طفل ، فتقوليله : العب في الجنينة براحتك ، وإنت محاوطه الجنينة دي بأسوار عشان ما يطلعش براها ، فعربية تخبطه ؟
نفس الشيء : ربنا قال لك : البسي وتزيني براحتك في بيتك واستمتعي بدا ، بس لما يكون حيشوفك رجال غير محارم سواء في بيتك أو براه : البسي حجاب وامنعي الزينة إلا ما ظهر منها
طاعة لأمري ، وصيانة لك من السوء ، وصيانة لغيرك من تحريضه على السوء بطريق غير مباشر
بس أنا وشي بيبقى شكله باهت من غير ميكب ؟
شكلك بيكون باهت عشان إنت أخدتي على شكلك بالميكب ، وعشان بتقارني نفسك بالبنات اللي حواليكي
لكن لو أخدتي على شكلك من غيره ، وتركتيه فعلا لله عز وجل ، حيبقى صعب عليك في الأول شوية ، لكن بعدين حتاخدي على شكلك دا - إلا لو عندك مشكلة صحية لا قدر الله
فاستعيني بالله وطلعي الناس ونظراتهم من دماغك - وهم أصلا ممكن يكونوا مش شايفينك بس إنت اللي متوهمة دا
وادعي ربنا يعينك ، وشوفي صاحبة متدينة تشجعك على دا وتقف جنبك ولو في البداية.
مفيش حد بيعمل أي طاعة أو بيترك معصية عشان هو جامد ، ولكن عشان ربنا بيعينه
فادعي ربنا يعينك ويحبب إليك مراضيه.
ءامين.

ليه البنت السمرا حظها اقل دايما مع انها خلقه ربنا والواحد ليس ف نفسه شئ لي بتوصلو الواحد انه يسأل ربنا هل دا اختبار ويعينه عليه ليه العنصريه والتميز ف المجتمع دا

July 24, 2024

طيب هو أنا مش حنكر إن فيه سخف بيحصل ناحية السمرا ، بس دا من ضمن السخف اللي مالي المجتمع عادي
وإذا إنت مش سمرا فحتلاقي مشكلة من ناحية تانية يعني ، فكله غالبا زي بعضه
ولكن حقولك شيء : اتنين عرفتهم من أماكن مختلفة ، لون بشرتهم قريبة من لون بشرة بكار - أبو كف رقيق وصغير :))
الأولى : تشع جمال وثقة ، ومش بتبطل تبسم وضحك
والتانية : وافقت تتزوج رجل أكبر منها ب ٢٠ سنة ، برغم إنها كانت في بداية العشرينات ، فلما سألتها : ليه بتعمل كدا ؟ ما قالتش أي ميزة فيه تعادل فرق السن
ولكن ردها كان : عشان سمرا وماحدش حيرضى بيها
ومهما حاولت أتكلم معاها ، كانت بتتكلم بقناعة كأنه أمر طبيعي وأنا اللي مش فاهمة !
والبنتين على فكرة جمالهم واحد تقريبا.
فالسوء اللي بتشوفيه : إنت اللي بتختاري إن كنت تتأثري بيه وتكرهي حياتك ، ولا إنت اللي بتتجاهليه وتقنعي نفسك إن الدنيا مليانة لاسعين ، وثقتي بستمدها من ربي ثم من جوايا
مش من نظرة الناس ليا.
ربنا يصلح لك الحال ويسعدك.

بنت معايا ف السكن بدأت اخد بالي انها بتستعمل الحاجات بتاعتي زي الاكل مثلا بتاخد منه تفطر بيه او لو في كيس بانيه تاخد تطلع منه - انا بتحرج اني اتكلم معاها مع انها ممكن تطلع من اكلي قدامي عادي ومش بتتحرج اصلا ع الرغم انها تقدر تجيب زيه - ف السؤال هنا هل عادي برضو لو اخدت حاجاتها من غير ما اقولها؟

July 24, 2024

ابتدي خدي من حاجاتها قصادها الأول ، بحيث تبقى عارفة إنك بتعملي زيها
ورأيي : إنك ما تعمليش كدا ، وكمان ما تسيبيهاش تعمل اللي بتعمله دا ، عشان ممكن تحصل مشاكل كبيرة بسبب كدا منها السرقة والتخوين
فمن الأول تتحط حدود واضحة ، ولما تاخد منك حاجة من غير إذن وإنت مكسوفة تواجهي صراحة ، حتقوليلها بهزار : إيه يا بنتي مش تستأذني ؟!
وإذا عاوزه من اللي إنت بتجيبيه : تاخدي فلوسه منها مقدم ، واشتري لها زيه
ومادام معاها أو حتى لو مش معاها : مفيش حد في السكن الجامعي بيمد إيده على حاجة حد من غير ما يستأذن
وإذا سكتي على دا حتسحب على كل حاجة عندك ، فجمدي قلبك وهي أول مرة حتتحرجي بعدين حتقدري بعد كدا تواجهي.
والعطاء حلو وجميل وعليه أجر لما تحتسبيه ويكون بكيفك ، مش غصب عنك ولا بسيف الحياء.
ربنا يصلح لك الحال.

اتقدملي حد قريبي وانا رفضت رفض قاطع بسبب اني مش عايزه جواز قرايب وكمان مش شايفاه غير قريبي مش حاسه اني هقدر اشوفه حاجه تانيه غير كدا واهلي شايفين اني غلط لانه حد محترم جداً جداً وذوق ومحدش يقدر يقول كلمه ع اخلاقه وشطاره وطموح والخ تفتكروا انا كدا غلط ؟ وهل كان لازم ادي فرصه ؟

July 24, 2024

لو إنت كانت مشكلتك بس إنك بتخافي من زواج القرايب : كنا قلنا إنك كنت حاولتي تديه فرصة
لكن حد إنت شايفاه قريبك أو زي أخوكي بس ، وإنت عارفاه مسبقا بحكم القرابة ، ومش قادرة تشوفيه غير كدا : فشيء طبيعي ترفضيه
لأننا ما بنجيبش الناس نقعدهم جنبنا ونشوف هل فيه أي احتمالية إني أتقبلهم قدام ، ولا أقولهم ألف سلامة بعد أما أكون عشمتهم ومش قادرة أتقبلهم!
فإنت موقفك أنا شايفاه صحيح، بس الأهل عشان بيبقوا خايفين على البنت ونفسهم تتزوج زيجة حلوة ويطمنوا عليها : كتير مش بيركزوا مع حتة قبولك للشخص من عدمه.
والموضوع اللي ينتهي ما تقلبيش فيه تاني مادمت اتصرفتي صح ، عشان التقليب مالوش فايدة غير الإيحاء بالندم.
ربنا يخلفكما خيرا.

هي البنات اللي بتلبس بناطيل مش هتدخل الجنة نهائي رغم اعمالها الكويسة؟؟؟ ممكن حد يرد ضروري

July 24, 2024

ماحدش يقدر يحكم بدا ، ولكن ليه الواحد يعمل في نفسه كدا ؟!
ولو حتتعذب شوية في النار وبعدين تدخل الجنة ، هل دا ممكن يكون عادي ؟!
جربي كدا تقربي صباعك من النار وشوفي حتتحمليها ولا لأ ؟ فما بالك بنار جهنم اللي مفيش بينها وبين نار الدنيا مقارنة - ربنا يعافينا ويرحمنا
استمري على الخير اللي بتعمليه ، والبسي حجاب ولبس شرعي برا بيتك وقصاد الرجال اللي مش محارمك ولو في بيتك
لكن غير كدا : البسي وتزيني براحتك في البيت قصاد النساء ، وفي قعدات القرايب والصحاب واتبسطي.
وادعي ربنا يحبب إليك الستر ويعينك على الحجاب اللي يرضيه ويتقبله منه.
أسبغ الله عليك ستره في الدنيا والآخرة وجعل تحت ما يرضيه ، ونساء المسلمين.

ازاي أمنع شخص عزيز عليا من مشاهدة الافلام اياها 😅 والدنا متوفي وملناش اعمام ولا قرايب خالص .. أنا بنت ومش بعرف برضو اتكلم معاه او اعرفه اني اخدت بالي😅😅

July 24, 2024

مالكيش دعوة
وما تفضحيهوش عند حد ، ولا تتبعيه وتشوفيه مستمر في المشاهدة أو لأ
عشان دا من تتبع العورات ، ومن تتبع عورة أخيه ، تتبع الله عورته وفضحه ولو في بيته
تتعاملي معاه عادي كأنك ما عرفتيش شيء ، وتحمدي ربنا على العافية وتسأليه يعصمك عشان مفيش حد كبير على الفتن
وتحاولي من بعيد لبعيد تزودي الإيمانيات عنده هو وغيره - إذا كانت علاقتك بيه شرعية وتسمح بدا ، ومن غير ما تبقي وصية عليه
وتدعيله بظهر الغيب ربنا يصلحه ويعصمه ، وتنشغلي بحياتك.

Liked by: drmarwan144

ازاى ادافع عن نفسى من التنمر بالذات لو أهلى

Yara Sherif

July 24, 2024

الأهل والصحاب لما يعلقوا على شيء : فبيكون هزار ، فيترد عليه عادي ، وكلنا بنعلق على بعض
أو تتجاهلي لو حد كبير ، أو تقولي صراحة إن لو سمحتي ما تهزريش على الأمر دا عشان بيضايقني
المهم ما تكونيش إنت اللي حساسة ومزوداها
ربنا يصلح لك الحال.

بئس الجار نحن

July 23, 2024

بئس الجار دي تتقال للمجرمين اللي في إيدهم يفرّجوا عنهم لكن ما أخدوش أي خطوة لدا ، بل بالعكس لو عليهم حيمنعوا أي تعاطف معاهم ولو حتى بالدعاء
وتتقال للمجرمين اللي زيهم اللي بيشرعنولهم ، واللي بيطبلولهم
والجيرة مش مقتصرة علينا بس ، ولكن على أهل بلدهم نفسهم الأول ، وعلى كل العرب بلا أي استثناء ، اللي مفيش حد فيهم فكر يطرد سفير أو يمنع بترول - لا سمح الله
بس هم - اسم الله عليهم - نددوا وشجبوا وخلوا ناس تعترف بيهم ؟
يروحوا يبلوا تنديدهم وشجبهم ويشربوا مايته
وما اتكلمناش كمان عن الاتفاقات اللي تحت الترابيزة والمساعدات اللي بتمر من الأراضي ، والمعابر اللي بتتقفل من ناحية وتتفتح من الناحية التانية
بس إلا البجاحة أعيت من يداويها.

واللي يفرط في العراق وسوريا قبل كدا ، واللي يفرط في أهله ويبقى عارف إنهم مظلومين في المعتقلات ولسه وضيع وبيطبل : هو اللي يتقال عليه بئس
لكن حد مغلوب على أمره ، يتجرع القهر والعجز ، وبيلعن الظلمة المجرمين وأعوانهم بلا أي استثناء ، وبيمرر على قلبه كلام ربه عشان بيخاول يرضى ويسلم : ما يتقالش عليه بئس.
(ولا تحسبن الله غافلا عما يعمل الظالمون إنما يؤخرهم ليوم تشخص فيه الأبصار)

معلش علشان سألت كتير محدش جاوبني لما بنصلي الفروض بنقول نصف التشهد بعد اول ركعتين وبعدها التشهد الكامل في الأخر ده لما يكونوا 4 ركعات طيب لو هم اصلا ركعتين زي صلاة الفجر بنقول نصف التشهد بعد اول ركعة وفي اخر ركعة التشهد كامل ولا بنقوله كله على بعضه في الأخر ؟

July 23, 2024

الصلوات الأربع والتلات ركعات : بنقول التشهد الوسطاني بعد أول ركعتين ، والركعة الأخيرة فيهم بنقول التشهد كامل
صلاة الفجر هي الصلاة الوحيدة اللي ركعتين بس ، مفيش تشهد أوسط ، وإنما التشهد الكامل في الأخيرة بس.
والمسلم/ة اللي يسأل سؤال زي دا : كتر خيره إنه عاوز يضبط صلاته ، بس دا يدل إنه محتاج يتعلم ما لا يسع المسلم جهله - يعني اللي لازم تعرفه مادمت مسلم
فيه فيديوهات عن كيفية الوضوء والصلاة خطوة خطوة على النت ، وفيه كتاب صغير اسمه : العشر الأخير ، فيه شرح لأمور كتير المفروض المسلم يكون عارفها ، وفيه أكاديمية زاد
ربنا يصلح الحال ويعلمنا.

لو حد قالي عاش من شافك مفروض ارد اقول اي ؟😂😂

July 23, 2024

الله يكرمك ، ربنا يبارك فيك ....كدا
أي ثناء مش عارفة رده ، ردي عليه بالدعاء للشخص .

روايةة حلوةة اقرأها 💗

Mariam ..

July 23, 2024

صور من حياة الصحابة حلوة يا مريم🌸

طب هو ينفع يكون في تجاوز لفظي في الكلام تحت مسمي دي طبيعتي كوالد وانا حابب اكون علي راحتي معاكي مش مصطنع انا مش حابه ده ووضحت اكتر من مره ، فهل ده عذر كافي اني امشي ومكملش ولا المفروض احاول اكتر معاه بسبب المجتمع اللي حواليه أنه بيتعامل مع الألفاظ البذيئه أنها عادي

July 23, 2024

الشباب بينهم وبين بعض بيحصل من كتير منهم تجاوزات لفظية وبذاءة
لكن مفيش حاجة اسمها إن الكلام دا يتقال عادي قصادك أو قصاد الناس ، وأصلي ما أحبش أكون مصطنع !
لأ
هو ما بيقولش الكلام دا قصادك وقصاد الناس عشان دي مجاهرة وحفاظا عليك من سماع القبائح ، مش عشان بيمثل إن عنده أخلاق!
هل دا سبب كافي إنك تمشي ؟
لو دا ديدنه - ما كانتش سقطة مرة وخلاص يعني - وبيدافع عن دا : فتمشي طبعا ، خصوصا إنك لسه ع البر.
وربنا يصلحه ويخلفك خيرا.

لما المطلقة تاخد الشقه بالتمكين والعفش بالقايمه والأولاد بالحضانه والمرتب بالنفقة يبقى الزوج هياخد إيه ؟

July 22, 2024

أولاد إيه معلش اللي الزوج بيكون زعلان إنهم في حضانة الزوجة ؟!
هو إحنا حنمثل ؟!
دي وهي مراته لو سابت العيال معاه عشان تعرف تطبخ ولا تغتسل بيبقى على آخره!
والنفقة والتمكين من الشقة عشان هي حاضنة ، مجرد ما بتنتهي الحضانة بيتاخدوا منها
ولا مش كفاية تربي العيال ، لأ كمان تنزل تشتغل عشان تسكنهم وتأكلهم ، والمحسوب عليهم أب يشيل إيده - وياريتها نفقة عدلة كمان !
والعفش: هو يجهز بيته بما في إمكانه ويخطب واحدة مناسبة لإمكانياته دي ، ويعطيها مهرها كامل ، ولما يطلق ياخد عفشه ، وربنا معاه.
الإمكانيات المادية في منتهى السوء بسبب إن خير بلدك منهوب ، فاللي يطلق ووراه التزامات حيفتح بيت تاني إزاي ومنين ؟
بس مش الحل إنه يرمي عياله ، ولكن يتقي ربنا ويحاول باللي في إمكانه ، وربنا كريم يفرجها عليه من حيث لا يحتسب.

اعيش مع بابا ومراته ولا ماما وجوزها + مرات بابا شديده جدا وانا مش صغيره ومش هعرف اخد راحتي قدام جوز ماما

July 22, 2024

مادمت مش صغيرة يبقى تعيشي مع بابا ، وتزوري ماما
وتعاملك مع زوجته باحترام ، إن شاء الله يخليها تحسن عشرتك
ومش كل الشدة بتكون وحشة أو تحكم ، أحيانا بتكون حفاظ عليكي
وادعي ربنا يعطيكي خيرها ويكفيكي شرها ويصلح بينكما.

نومة القبر طويلة وداخل القبر مظلم فإن استطعت أن تنيره بكثرة الصلاة والسلام على النبي مُحَمَّد فافعل.

July 22, 2024

صلى الله على النبي وعلى آله وصحبه وسلم تسليما كثيرا.

مع ولا ضد.. الناس من بعيد احلى؟

July 22, 2024

ناس من بعيد أحسن ، وناس من بعيد ولما تعرفهم كويس بيكونوا أحسن من وهم بعيد
وناس لا من بعيد ولا من قريب

لو رجع بينا الزمن هل فعلا كنا هنصلح اخطاء الماضي اللي وصلتنا لأخطاء الحاضر ولا كنا هنفضل زي ما إحنا؟

July 22, 2024

ما أعرفش
بس أظن إن لو رجعنا حنختار نفس اختياراتنا تاني
والخطأ زي ما فيه جزء سيء ، ففيه جزء كويس وهو إنك بتتعلم.

ايه رأيك في الناس اللي بتدور علي عروسة من علي اسك ؟

July 22, 2024

مفيش الكلام دا
الناس بتعشم نفسها على الفاضي ، لكن مفيش حد بيتزوج من مواقع التواصل
مواقع تواصل كانت وحتفضل في الأصل = تسلية
وتعرف فكر شخص بداية تعاملك معاه من أرض الواقع لكن مش العكس.

نزلت شاوت امبارح زي دلوقتى وكان نفسى الامارة بالسوء وشيطاني مسيطرين عليا حبه ونزلت شاوت كلامه افتح بيه كلام مع أي حد ولحظات الفراغ دي ورد لحد الان بيجيلي ردود واتكلمت ودخلت فضفضه وبتاع بعدها حسيت بالندم وصليت واستغفرت ونزلت شاوت فيه تضرع ودعاء وبطلب من الناس تدعيلي بالهدايه حرفيا محدش رداحنا ف غفله

July 21, 2024

لما تغلطي وتتوبي ما تبصيش على الناس وتصرفاتهم ، وما تشغليش قلبك بحد
مش وقته
(وكلهم ءاتيه يوم القيامة فردا)

إنت غلطتي وبتتوبي لربك والمفروض إنك زي ما بتحسني بيه الظن إنه يغفر لك ، فأكتر من دا إنت خايفة ما يقبلش توبتك ويعذبك بذنبك
فاشغلي قلبك بالمعاني دي وطلعي تصرفات الناس من دماغك
والإنسان لما بيندم على تصرف ما في مكان ، الطبيعي إنه يجتنبه أو على الأقل يبعد عنه شوية ، مش يقعد فيه وفيه حاجات بتشجعه إنه يعمل نفس الغلط تاني.
فانشغلي بنفسك ، ربنا يتوب عليك ويغفر لك.

+ 1 💬 message

read all

متقبلتش ف الشغل ومتقبلتش من العريس🙂🙂 ومعرفش ليه واي مشكلتي وليه اترفض اتخطي ازاي!!

July 21, 2024

قولي الدنيا حر ، وربنا رحمني من النزول في الجو دا ، أو أفرهد نفسي مع إنسان والواحد متحمل نفسه بالعافية أصلا 😁
ما تزعليش ، اللي اتصرف عنك ما كانش خيرك فيه ، وكل شيء بأوان ، بس أحسني الظن بربك
ربنا يخلفك خيرا.

ما هو أكثر شيء يمكن أن يسبب لك القهرة والبكاء؟

July 21, 2024

ادخلي تويتر وإنت تتملي
ربنا يفرجها من عنده ويكشف عن عباده ويرحمهم.

شيماء الشافعي

Nothing here yet