...
ما بفهم في العزف والمقامات، بس بعرف أقول (الله الله) لما الوتر يُذبح، أو لما يبدأ العازف بالانهماك في عزفه، والأدهى من كل هيك انه كل عازف اله تعابيره الخاصة فيه، يمكن هالشيء بعود لنوع الآلة اللي بستخدمها، وبحبش أسمع اشي حلو خاصة لو كان حزين مع حد، بحس انو ردات فعلي غبية ممكن أي حد يستهجنها وما يلاقيلها مبرر أو يحسها (اوفر)، لكن أنا بكون في قمة التركيز والاستمتاع والتسلطن لهيك في هيك حالات (لحالك أحلالك)، بعشق الوتريات بشكل عام بحسهم أقرب للروح، بعرفوا يجرحوا منيح، لكن غسان ابو حلتم حببني في آلات النفخ، بتزكر زمان اني ما كنت أقدر أكمل أي مقطوعة موسيقية بدون صوت مغني، وكنت أعتبر اللي بسمعه مقطوعات (حاف) هبل، لكن من أسعد أيام حياتي اني صرت جزء من هدول (الهبل)، ولا لما أسمع شيء خارق للعادة بصير أقول كيف أخبي، وممنوع أعمل لايك لحتى الأوغاد صحابي ما يسمعوه، لأنهم صاروا عارفين انو أنا ما بعمل (ريبوست) على "الساوند كلاود" بس بعمل (لايك)، فقررت الفترة الأخيرة أصير أعمل (داونلود) لهاي الأشياء، وبعد هيك نشلتني الأصوات بطريقة غريبة، كأنو ذائقتك الموسيقية بتتحسن كتير لما تصير تسمع موسيقى، فبتصير أجمل في انتقاء الاصوات اللي تطربك أو تعمل أي اشي مفيد في راسك، ولسا بعاني من جملة (يما يما يما) بتشديد الميم لما أسمع اشي يفترك راسي، ويما يما ايش ازهقت من الأقواس اللي كتبتها في هاد القصة المملة.
Liked by:
Raghed Abu Zaid | رغو
Siteec