فيه ناس عندها فوبيا اقتحام الخصُوصية، ناس مبتسألكش على تفاصيل؛ لإنها ببساطة خايفة لَتكون عاوز تحتفظ بحاجة لنفسك، ناس مبتحاولش تعرف حاجة محكيتهاش، مبتدوَّرش وراك فـِ حاجة مقولتهاش، مبتبصش فـِ موبايلك لو رَن قُدَّامهم، لو إديتهم صورة يتفرَّجوا عليها، مبيشوفوش غيرها ومبيقلبوش، لو اتكلمت قُصادهم مع حد غيرهم، مبيسمعوش. الناس دي على أد حرصها ده، بتستنى المُعاملة بالمثل من الغير، بيتضايقوا جدًا لو حد إتدخل فـِ حاجة ملوش علاقة بيها، أو لعب فـِ حاجة بتاعتهم من غير ما يستأذن قبليها، ومع ذلك مبيحرجوش حد، بيحاولوا يفهموه، بس كتير مبيسمعش. ويفضلوا بيحاولوا ينشروا ثقافتهم، وينادوا باحترام الخصوصية، بس الناس مبتقدَّرش، وكل واحد يفضل يتدخَّل فـِ الـ ميخصوش.