عادة مش بحتفل بعيد ميلادي بحفلة والحوارات دي فمش هقدر أفيدك في النقطة دي، بس دايمًا بحاول أخليه يوم مميز فهقولك كام حاجة تعمليها.. • اكتبي لنفسك عنك، عن خطواتك أو الحاجات اللي عملتيها واتعلمتيها خلال السنة، وأحلامك في السنة الجديدة، ونفسك تعملي إيه مهما كانت حاجات تبان تافهة. • طلعي صدقة حتى لو كانت صغيرة سواء بنفسك لحد تعرفيه، أو من ڤودافون كاش مثلا • اشتري البالونات بتاعت الأرقام دي واتفقي مع حد من أخواتك أو أصحابك يصورك • اخرجي اشتري لنفسك حاجة بتحبيها أو محتاجاها حتى لو صغيرة، خاتم، سلسلة، شنطة، غيري كاڤر الموبايل مثلا • اتفقي مع أخواتك واطلبوا أكل من برا • اعملي موڤي نايت لذيذة كده فيلم خفيف مع شيبسي وآيس كريم ولب أو فشار أو أي حاجة بتحبيها سواء لوحدك أو مع عيلتك وماتتضايقيش طبيعي مانكونش حابيين فكرة إننا بنكبر، لكنها سنة الحياة فضروري نقبلها بصدر رحب ونحاول نعيش اليومين اللي باقيينلنا هنا بسلام 😅 وكل سنة وانتي طيبة وبخير مقدمًا، ربنا يجعل سنينك الجاية ألطف وأخف ❤
