انا بحب الناس الحنينة ، اللى بتجبر بخاطر الناس ، اللى مش بتتكبر عليهم وبتحاول تساعدهم بأى طريقة ، الناس المبهجين المبتسمين الصادقين ، الناس اللى مبيهونش عليها تكسف حد ومبتستخسرش الكلمة الحلوة فى حد محتاجها ، الناس اللى وجودها فى حد ذاته يطمن ، ويحسسك إنه فى حد جنبك هيسمعك ويطبطب عليك حتى لو ميعرفكش ، الناس اللى تحس ان ربنا خلقهم بس عشان يكونوا رحمة ع بعض فى الأرض ... ! ?
دايما اللي بيفرق في التعافي من الزعل و اللي بيخلي الواحد يسامح التوقيت .. توقيت الاعتذار و توقيت الإعتراف بالغلط ، فيه ناس بتبقى مدركة انها غلطانة و عارفه انها لازم تعتذر بس بتفضل تأجل الاعتذار بحجج .. معلش خليه يهدى اصله مش هيسمعني و هو متضايق بعدين هبقى اطيب خاطره بكلمتين و الحقيقة ان التأجيل ده اكتر حاجه بتدمر العلاقات سواء صداقة او غيره بتدمرها على مدى البعيد و القريب و على كل المستويات ،كل لحظة تأجيل بتشيل طبقة حب من القلب بتقلل المعزة و بتكسر جزء من الود اللي رابط بينكم ،الإعتذار السريع بيخلي الجرح يلم بسرعة و يقلل فترات اللوم و العتاب و بينعش القلب و بيخلي الواحد عارف قيمته جوه قلوب اللي بيحبهم ..?