" قصة ? وياي بنية بالجامعة بنفس مرحلتي و قسمي جان يعجبني احجي وياها بس لان احب اعرفهه و اكون صديق الهه عجبني بيهه الانفتاح و الجراة و الممزوجة بخجل و عفوية احسهة طفلة بريئة بس كل تصرفاتها بالنهاية راح تخليك تبتسم لظرافتهه ... عمرهه مجانت متقلبة بتصرفاتهه و لا مزاجية ، جانت تسلم عالكل بس مجموعتهه الي تفضلهم وحد . جنت اراقبهه من بعيد مثل اسد يراقب فريستة جنت افرح من اشوفهه مثل فرحة طفل من يبدي كارتون توم و جيري .. مو لان معجب بيهه بس لان هي الوحيدة الي جانت حقيقية بتصرفاتهه . رغم الي ذكرتة من اشياء حلوة عنهه. مرحت حتى اسلم عليهه صابني الغرور و التكبر من مبدأ (( الي يريدني هو يجيني )).. زاد شعور المكابرة تجاهه لدرجة كمت اتغاضى عن شوفتهه .. اغلب صديقاتي جانن يكرهنهه ﻻن هي بنت متحررة يشوفنهه قليلة الادب لان مرة ضحكت بصوت عالي و ما عدهه اخلاق لان مرة لبست قصير و ام لسان لان ترد على الي يجاوز عليهه بنفس الاسلوب . ما اخذت كلامهن بمحمل الجد 100% بس ظل براسي . لحد ما اجة بيوم احد اصدقائي المقربين يوصفهه بابشع الصفات و كلام الشارع .. و السبب لان صارحهه و رفضتة . لان كلتلة الزواج مو من اولوياتي و لا الدراسة احب اكون حرة مثل طيرة و ما مسجونة بقفص تعيش بعش واحد .. الزواج حلو بس ممفكرة ... صار يسميهه الساقطة لان رفضتة و يومية يطلع اشاعة عليهه صديقاتي انضمن وياه و كامن يطلعن عليهه سوالف و سوالف الاغلب منهه سطحية و فجأة شعور المكابرة بية انتفض كأن احاديثهم الكبريت الي شعل الحطب . اشتعل لدرجة عيوني كامت متشوف و اذاني صارت الموجه لقراراتي و قاضي الاحكام ... البنية تجاهلتهه تماما مرت ايام و اشهر وية صديقاتي و اصدقائي الي معتبرهم الملح و السكر و الشي الي سوا طعم للكلية لحد ما غبت فترة عن الدوام بسبب ظروف الصعبة .. الصراحة جنت منتظر من كروبي شخص يسأل و محد سئل .. شهر كامل اغيب عن ناس معاشرهم سنين ميسألون ! ... تحسنت اوضاعي رجعت للدوام كروبي اسلم عليهم يردون السلام كأنما ضيف غريب لازم يجاملوا تعجبت لتصرفتهم و اسبابهم و تبريراتهم اقبح من التصرف بحد ذاته .. تعكر مزاجي بيومهه رحت كعدت وحدي بالملعب المهجور عنة طلابه اتذكر ايامهم اتندم و اتحسر .. مستغرب عليهم ... حاولت افرك عيني يمكن هذا كابوس . بس لا هاي حقيقة !. احجي وية نفسي و ايدي على وجهي مثل الخجلان من شي . سمعت صوت مألوف بس مجاي اذكر اتذكر المن شفتهه واكفة كبالي سلمت علية .. حسيتهه دتكول استفقدتك بس شي منعهه حاولت تضم هالشعور بس عيونهه فضحتهه و شهكة انفاسه بالكلام الي مليانة خوف و خجل مثل وكفته كبال جمهور واسع . نطتني دفاتر و ملخصات بدون ما اطلب منهه مال فاتني من الشهر الراح تكلي اقرة و انجح حياتك ميحدد مصيرهه غيرك . لتخلي احد يتحكم بحياتك و قراراتك و علاقاتك الناس مهما كالت نريدك يجي يوم و ينكشف قناعهه . راح يبقى يمك الي يريدك و ان كان يشوفك بالشهر مرة مو الي انتة تريدة لتحكم على الناس من مظاهرهه و لا من كلام الناس شوفهم و اعرفهم و احكم عليهم . لتاخذنة نظرة عني انه اني البنت الموزينة لان رفضت صديقك و لان احب اكون حرة و لا نظرة صديقاتك الي شافني ممتربية لان من اضحك .. اضحك صدك و ما اتصنع ابد اريدك تبقى ماخذ نظرة عني انه اني ذيج البنت العفوية البريئة الي اخذتهه عني اول مرة .. -شلون عرفتي اني جنت انظرلج هيج ؟! - اللهفة الي بعيونك كالتلي . . ( القصد لتصدك شي بمجرد تسمعة بدون متشوف بعينك و تتأكد و عمر الناس مجانت تتقيم بلبسهة و مظهرهة الشخص يبين بأفعالة )...