الإمام علي إن أبي طالب قال مقولة عظيمة "لا تدعَنَّ جهْل الناسِ بكَ يغلِبُ عِلمكَ بنفسِك"، يعني متخليش عدم دراية الآخرين بقدراتك وإمكانياتك وحكمهم عليك هو مقياسك لنفسك، لإن محدش هينصِفك، والكلام ده بتواجهه كل يوم في حياتك الشخصية أو العملية، وبتكتشف إن عدم مقدرتك على الثناء على نفسك وشطارتك والي بتعمله بيخليك دايمًا متقيِّم غلط، ومش واخد حقك، ومبصوصلك بصّة أقل من اللي حواليك، مع إنك ممكن تكون الأكفأ، والأحسن، والأذكى، بس كل مشكلتك إنك مبتعرفش توصَّل ده للناس، أو تعرَّفهُم اللي إنت قادر تعمله، والناس نادرًا ما بتكون عادِلة في حُكمَها، إلا من رحِم ربَّي.
أكبر غلطة ممكن تعملها في حق نفسك إنك تقعد تدوّر عالكمال في كل شيء بتعمله في حياتك، تأجل قرارات، خطط، أحلام، وترفض تاخد الخطوة عشان شايف إنك مش هتعرف تعملها كأحسن حاجة، أو زي ما الكتاب بيقول، لإنك هتكتشف في الآخر إن كل اللي حواليك اتقدموا وسبقوك بكتير وإنت لسة واقف مكانك، وهما مكانوش أحسن ولا أشطر منك، لكنهم بدأوا سعيهم واستمروا بخطوات صغيرة حتى لو مش كاملة، وإنت فضلت كتير مستني اللحظة المناسبة، والخطة اللي مفهاش غلطة، والتنفيذ المثالي، اللي عمرهم ما جُم، ولا هييجوا.
تقديرك لنفسك ولقيمة نفسك واللي تستحقه واللي ماتسحقوش هايفلتر الناس اللي حواليك automatically من غير ماتبذل أي مجهود .. من غير أصل وفصل ومبررات وخلينا نتكلم ومعلش وأخر مرة .. الوضوح وعدم القبول بأقل مما تستحق من أول مرة هايحل مشاكل من قبل ما تبتدي.