عندك صورة لحكي مثل وش تشوفوني بعينكم او اللي يذكركم فيني يعني زي كذا 🙄 لو فيه ابيها الله يسعدك ❤️
ما فهمت والله أيش قصدك 😅
انا درجاتي كويسة و مركبتي عالية الحمدلله و مترددة بين الطب و الصيدلة ،كنت داخلة صحي على أساس أتخصص صيدلة إكلينيكية بس مؤخرا بديت افكر بالطب و حتى أهلي صايرين يضغطون علي ... محتارة والله قلبي متعلق بالصيدلة و بنفس الوقت ابي طب
أصعب خيار 🙁💔 شوفي الطب هو أكثر تشخيصي لكن الصيدلة يعني تختص بالدوا وصرف الدوا وتحديد الأدوية المناسبة وهالأشياء يعني أنتِ أيش أكثر شي حابه؟ لأن طبيعة عمل الطبيب تختلف عن طبيعة عمل الصيدلي كثير، أنتِ شوفي مين اللي طبيعة عملهم أقرب لقلبك، استخيري بالموضوع كثير، أسألي أطباء وصيادلة كثير وشوفي أيش اللي اقتنعتي فيه أكثر وأيًا كان التخصص اللي راح تدخلينه ترا كلهم حلوين ويا حظك فيهم
نظامنا بالعايله انو ما نتزوج من برا القبيله وهذا الشي ينطبق علي كنت ابي طب اسنان بس المل بدون استثناء قالي راح تتلاشى فرص زواجك لان كم بنت دخلو طب وبيصلون الاربعين والناس يرفضونهم بسبب الطب تفقعت عيوني من الصياح شسوي
أنتِ قرري بنفسك هل تبغين تدخلين طب أسنان ولا تبغين تتزوجين استخيري وفكري كثير بالموضوع، مهما كان قرارك بالنهاية راح يكون هو الصح، أهم شي حتى لو ما دخلتي أسنان كملي دراستك بالجامعة شهادتك هي أولى ما عليك
انتي ذاكرتي العام ؟
لا بس لو يرجع بي الزمن لورا كنت ذاكرت
نزلت معدلات التحضيري؟
المعدل في البوابة مدري عنكم معدلات التخصيص لا ما نزلت
كلامك خلاني أحسب بتأنيب الضمير و خصوصا و اني بطيئة بالمذاكرة و احب اراجع و أعطي كل مادة حقها 🙁و بالطب زين تلقون وقت تخلصون عشان تلقون وقت تراجعون😥تتوقعين هالشيء بيكون عائق لي💔؟ ودي ارتاح عشان ارجع للدراسة بنفسية حلوه 😢💔
دامك تبغين ترتاحين أبد أرتاحي واستمتعي بإجازتك ولا يأنبك ضميرك ولا شي وإذا بديتي دراسة بيمديك تذاكرين إن شاء الله إذا رتبتي وقتك صح
لولو السنة الجاية حكون تحضيري تعرفي شايلة هم إيش؟ اول يوم ادخل الجامعة فين اروح؟ والله جد دخلت خلاص وبعدين اش اسوي؟ وحكون لوحدي ما اعرف احد غالبًا والله اشغلني الموضوع 😂😂
ترا التحضيري صغييييييرة ما يمديك تضيعين حتى 😂 وأبد أي شي تحتاجينه بتلاقين أستاذات موجودين اسأليهم باللي تبغين وراح يجاوبونك بيكون طلع الجدول حقكم، أطبعيه معك وروحي للقاعات المحددة بجدولك وخلاص، والله ما يخوف الموضوع ولا يحتاج شيلة هم أبد
لولو ايش مقررة تسوي بالاجازة وايش بتدرسي؟
أنا قررت معد أقول خططي لأحد، كل ما قلتها أتفشل وما أسويها 😂 بس الأكيد راح أحفظ قرآن إن شاء الله
انا احس مب منطقي اذاكر شي ما ادري وشو احس الوحده تطور من لغتها هذا كفايه وانا ما ادري 😂
أبد يكفي دامك تشوفينه كذا 😁 صدق ترا كل واحد ورأيه، أنا من كلامي كنت أقول إنك بتلاقين ناس تقول لا تضيعين وقتك بالمذاكرة وناس تقول يا ليتني ذاكرت، وعادي كلهم حقهم معهم ومافيه صح من خطأ بهالموضوع
خلصنا التحضيري اليوم والمفروض اني أكون سعيدة لكن لما💔 اشوف البنات كل وحده مع صديقتها وطالعين يوسعون صدرهم وانا وحيده يضيق صدري والله مو حسد ابدا الله يهنيهم بس غصب عني💔
يعني ضايق صدرك ما عندك صديقات؟ طيب باقي لك أقل شي ثلاث سنوات بالتخصص كوني صداقات مع البنات وصيري تطلعين معهم وتستانسين أيش المشكلة 😅
مدري عنكم والله 😂 ما أعرف أتوقع وأنا فاشله جدًا بالتوقعات 😂
اذا تخصصنا طب ان شاء الله ايش نذاكر؟
افهموا كلامي أنتوا قرروا ما ينفع أنا أقرر لكم 😅 تبغين تذاكرين عشان تكونين لك أساس للمواد الصعبة؟ تبغين تذاكرين المواد السهله عشان تلاقين الوقت للمواد الصعبة؟ تبغين بس تكونين لك أساس لكل المواد بشكل عام؟ أنتِ جاوبي على هذي الأسئلة وعلى هالأساس حددي أيش المادة اللي تبغين تذاكرينها وأيش بتكون طريقتك وذاكريها
لولوه انا موزونتي تقريباً مع النسبة اللي اتوقعها بتحصيلي ٩٣ . ادخل سعود ؟ ولا ماتدخلني طب ؟
استني لحد ما تطلع درجتك بالتحصيلي وبعدين فكري تبغين الصدق أنا أشوف استني إذا مركبة الطب هذي السنة كانت منطقية قدمي حلوه مركبتك، إذا مره عالية استخيري قبل وبعدها قرري لأن أحسن يحير مره الوضع 🙁
طيب لو ابغى اذاكر وين القى السلايدز ؟ وهل هي موحدة كل سنة
لا مو موحده إذا أنتِ بجامعتنا فيه موجودة بdownload center، اكتبي بقوقل download center ksu ويطلع لك
احنا الي مخلصين تحضيري نذاكر ايش؟
إذا تخصصتوا إن شاء الله فكروا أيش تذاكرون 😂
ايش هدفك بالحياه؟
أكون طبيبة ناجحة تساهم بتخفيف آلام الناس
اخلاق اخلاق اخلاق 💙💙💙💙💙احبك والله 💙
يا قلبي أنا 😢❤️ شكرًا على حسن نيتك، ويارب فعلًا أكون عند حسن نيتك
في احد دارس في معهد الفيصل؟ عادي سندي ادخل بس شهر ولا مايصلح لانه سنوي وبالكثير ٦ شهور والقليل٣ شهور
ما أعرف والله أحد هناك 🙁
انا الان ادرس تأسييسي في نورة وناوية ان شاء الله اقدم على سعود هالسنه ، هل لازم اسحب ملفي من نوره قبل ما اقدم ولا عادي ؟
أفضل تسألين عمادة القبول والتسجيل هم الأعرف بهالموضوع
لو عندك وقت المواد اللي قلتي ناخذها كل بلوك عادي تكتبينها وتكتبين كل مادة عن ايش تتكلم متى مافضيتي عادي مو مستعجلة بالاجابة ❤️
Anatomy : علم التشريح، يتكلم عن الشكل الظاهري لكل عضو في البلوك وعلاقة الأعضاء الأخرى فيه، مثلًا في بلوك الكارديو ندرس القلب وشكله الخارجي وكل المكونات اللي فيه ثم بعدين نروح للأعضاء اللي تكون أمام القلب خلفه فوقه تحته كذا يعني Biochemistry: الكيمياء الحيويه، يدرس التفاعلات الكيميائية بالجسم، أحيان تكون لها علاقة بالبلوك وأحيان لا وفيها بعض clinical applications، يعني مثلًا انزيم يحول هذي المادة إلى مادة أخرى طيب لو صار فيه خلل بهذا الأنزيم أيش المرض اللي ممكن يصير Embryology: يتكلم عن نمو أعضاء الجنين، بكل بلوك بتدرسون نمو الأعضاء الخاصة بهذا البلوك، بالنسبة لي هذي المادة ممتعة إذا فهمتوها، تدرسونها وانتوا صدق تقولون سبحااااان الله Family medicine: بس بتدرسونه في بلوك respiratory وبتدرسون عن التدخين وتأثيره وهالكلام يعني Histology: من أظرف المواد بكلية الطب، صح يتنسى بسرعة بس خفيف مذاكرة وأسئلة، علم الأنسجة وبتدرسون فيه عن الشكل المجهري للأعضاء، بالبداية بتتعرفون بشكل عام عن هذا العلم والصبغات وأهم المكونات المجهرية اللي تشوفونها بعدين مع كل بلوك تبدون تاخذون الشكل المجهري للأعضاء الموجودة بهذا البلوك، بتحبونه أكثر من بروف رئيسة فضيعة جدًا جدًا 😍 Human genetics: بتدرسونه بس بالفاونديشن، ما أدري إذا اخذتوا الوراثة بالتحضيري ولا لا لكن هو مره يشبه له مع زيادة تعمق شوي، مادة حلوه وإذا دكتورة مرام بتدرسكم بتكون أحلى وأحلى Immunology: علم المناعة، أول شي بيدرسونكم عن علم المناعة والأشياء المهمة والأساسية فيه بعدين بتدرسون عن معنى الأمراض المناعية وبتاخذون في كل بلوك الأمراض المناعية وكيف تصير Microbiology: علم الأحياء الدقيقة، تدرسون عن المخلوقات المجهرية مثل البكتيريا والفيروسات والفطريات وبكل بلوك بتدرسون أمراض معدية وأيش المخلوق المجهري المسبب لها وأيش الأعراض والأنواع وآخر شي أيش العلاج Pathology: علم الأمراض، يدرس عن الأمراض كيف تبدا وأيش مسببها الرئيسي وكيف تتطور، وأهم شي يدرس التغيرات المجهرية في هذا المرض، يعني لمن يصير هذا المرض أيش راح أشوف تحت المجهر من تغيرات بالعضو Pharmacology: علم الأدوية، بالبداية بيدرسونكم عن الأشياء الأساسية بهذا العلم والمفاهيم الرئيسية بعدين مع كل بلوك بتدرسون علاج الأمراض اللي درستوها بهذا البلوك، كيف يشتغل الدوا أيش استخداماته وأيش الآثار الجانبية حقته، بالنسبة لي من أجمل مواد الطب رغم إنه يتطلب فهم وحفظ كبيرة جدًا لكن يظل مادة جميلة جدًا جدًا جدًا خصوصًا مع بروف حنان 😍 Physiology: سيد الطب هذا 😂 مادة علم وظائف الأعضاء، يدرس عن كيفية عمل الجسم في الحالة الطبيعية باختصار، صدق من أجمل المواد بكلية الطب ويكاد يكون الأجمل على الإطلاق لولا بثارتهم بالساك أحيان 😂 بالنسبة لي هي المادة اللي أنا دخلت الطب عشانها وهي صدق أساس الطب، حاولوا قد ما فيكم لو تدرسون أو تفتحون بيبي قايتون أو حتى ليندا لأن بعض الأحيان الدكاترة ما يعطون هذي المادة حقها زين Radiology : علم الأشعة، بيعطونكم صور أشعة وتتعرفون عليها، بس درسناها بMSK ودرسنا شكل العظام الطبيعي ودرسناه بالرينال أول شي عن أنواع الأشعة وفوائدها ومضارها بعدين بالنهاية اخذنا صور أشعة طبيعية للجهاز البولي وبعض الصور لأهم أمراض الجهاز البولي
بأتكلم عن هالموضوع بكلام طويل فأنا آسفه لكن صدق اتمنى تقرون كلامي كويس أهم خطوة لكم حاليًا واللي لااااازم تتعلمونها إنه صدق جى الوقت اللي أنتوا تحددون كل شي يتعلق بدراستكم، أنتوا اللي تعرفون لنفسكم أيش ينفع وأيش ما ينفع لكم وتطبقونه بتلاقون ناس تقول استمتعوا بالإجازة وفلوها ولمن تدخلون الكلية بتلاقون بنات يقولون يا ليتنا كنا مذاكرين أيام العطلة الصيفية وما سمعنا كلامهم، فعشان كذا أنتوا حددوا طريقكم بنفسك تمامًا ومالكم أي دخل باللي سووه غيركم، لا تسألون غيركم عن رأيهم بمادة معينه أنتوا جربوها، لا تسألون غيركم أيش الطريقة الصح للمذاكرة انتوا اكتشفوها بنفسكم، صدق صدق مهم جدًا تعرفون أيش يناسبكم وتطبقونه هذا أهم شي بحياتكم بالتخصص أما بالنسبة لسؤالك كنت أتمنى ألف مره لو ذاكرت على الأقل مادتين اللي هم مايكرو وفارما، بس جزئية الفاونديشن خصوصًا المايكرو لأنه يبنى عليه أشياء كثيرة مره بعدين، ولو قدرت بعد ذاكرت بعض المواد البسيطة عشان أخلي وقت أكثر للمواد الصعبة أهم شي حاليًا تسألون نفسكم هل أنا أبغى أذاكر بالإجازة ولا لا، إذا والله عندكم استعداد ذاكروا مافيه مشكلة تستغلون إجازتكم بشي جدًا مفيد لكم