أعلم أني لن أنال شيئا من كل هذا، أعلم أني أعيش حلما جميلا المستحيل أقرب من تحقيقه، قلبي ينفجر حزنا، و الروح غادرت الجسد منذ وقت طويل، منذ أن تعلقت براحل .. حتى أن الغريق الذي تعلق بالقشة كان حلمه في النجاة أكثر واقعية و قابلية للتحقيق .. كنت أعلم منذ البداية و لكني أبيت أن أتخلى عن تلك السعادة و هذا الأمان .. كمن ضحى بما تبقى من حياته في سبيل أن يحيا بضع دقائق في جنة اختلقها له وجود شخص آخر .. و الآن و لعمق الشعور .. تبلد كل ما بي حتى أصبحت جوفاء، صماء المشاعر ..
كنت لسة بتكلم مع أختي دلوقتي إنه مافيش شغل و انه ماحدش بيشتغل بشهادته و ما إلى ذلك من مستقبل مالهوش ملامح .. أغلب الشغل دلوقتي بيكون يا اما حر يا اما في شركات خاصة و هكذا .. ففكرت إنه نفسي يبقى عندي مشروعي الخاص بدل ما أنا شغالة في مشاريع الناس، نفسي أعمل حاجة جديدة و أطورها، نفسي أوصل لدرجة من النجاح اللي تخليني فخورة بنفسي على المستوى المهني، دايما شايفة نفسي بشخصيتي في موقع سيدة الأعمال الناجحة .. أنا موش بصالها ماديا على قد ما بصالها إنه يبقى ليا كيان مستقل بذاته، مختلف عن الباقيين، بيقع و يقوم و يطور من نفسه.. و ده كله بوجود تيم داعم ليا بيشاركني في كل خطوة، نقسم مع بعض فشلنا قبل نجاحاتنا، يبقى شغلي هو بيتي التاني و زمايلي هم أهلي ..