مش شايفين انه حياتنا تحولت للغة برمجة صرنا مجرد ارقام مدخلة اعطونا قيم عددية تحدد هوياتنا سلبونا مشاعرنا الحقيقة ودخلوها كمتغيرات على معادلات محسوبة وفرقوا بينا بالفواصل العشرية متأملين انهم يخرجوا بنتيجةبس ما رح يوصلوا الا لنتيجة سالبة لانه تعويض قيمة الروح دايما متغيرة . فقدنا شعور الاعجاب من اول نظرة ، وسرقوا منا العفوية ، دثروا التعارف تحت زر طلب صداقة حتى الصدفة ما تركولها مجال بحياتنا ، زر الاعجاب صار طريقة للفت النظر ، حولونا خجولين من الاعتراف بوجه الي بنحبهم واعطونا تعليق ما بكفي نعبر عن الي جواتنا حصروا مشاعرنا بمساحة صغيرة، ولما اجو يواسونا صرنا نعبر عنها باعجاب ، حب ، حزن ، سعادة ، وغضب وكانهم اختصروا المشاعر بهي الكلمات واحنا احيانا ما بنعرف شو حاسين وكيف نعبر عن الي جواتنا ، ولسخرية التحديث انه ما بنقدر نختار الحزن مع الغضب او الحب مع الاعجاب او السعادة مع الحب والاعجاب ، مشاعرنا مخربطة وأصعب من انه نعبر عنها بدينا نفقد الاحساس بالواقع يوم عن يوم بنمشي بالطرقات ما بنشوف الي قدامنا مع انه احتمال نلتقي بشخص بنعرفه او نتعرف عليه ويكون سبب بتحويل حياتنا بشكل كامل . كل يوم بنفقد جزء من ارواحنا واحساسنا بالحياة الحقيقة بالآخر رح نمتزج مع اجهزتنا ونصير جزء منها بنشوف الحياة من خلال شاشات اجهزتنا الصغيرة لما كان قدام عيونا كل العالم صرنا لما بدنا نتذكر نرجع للصور ونتفرج بس مش قادرين نتذكر لانه ما عشنا اللحظة بقلوبنا وما نحفظت جواتنا ونضيع كل لحظة حلوة ممكن نحس فيها ننسى كيف هو الشعور بتنهيدة طالعة من جواتنا رح ننسى كيف كنا نحط ايدينا على قلوبنا لما كنا نشعر بشي باحساس حلو .