___🌿
كنت بكتب حاجة من شوية ، وسرحت مع مشهد فيه الشخص اللي بكتب عنه بيرمي نفسه في حضن حد بيحبه وبينسى مشاكله كلها للحظة واحدة بيرتاح للحظة واحدة بس وبصراحة اتخطفت كده شوية لما لقيتني بسأل نفسي "هو انا ليه مبعيش اللحظة دي أبدا؟" انا عندي ناس كتير في حياتي بحبهم وبيحبوني أولهم بابايا ومامتي واختي ليه بقى مبعرفش أنزل الدنيا من على دماغي -ولو للحظة- وأترمي في حضن حد فيهم؟ ليه دماغي مبتقفش؟ وبعد شوية تفكير عرفت أصل المشكلة دي من كذا سنة وانا عارف إن من مشاكلي الضخمة إني شخص مثالي ومثالي مش بمعني إني شخص كويس لأ مثالي معناها إني شخص عايش بمبدأ "يا أبيض يا أسود" ودي مشكلة كبيرة على فكرة انا مبعرفش أفرح بنص نجاح نص النجاح بالنسبالي فشل مبعرفش أبص للخطوة اللي مشيتها الخطوات كلها لا تعني شىء بالنسبالي مادام لسه موصلتش مبعرفش أفرح بخروجة حلوة لو حصل في نصها موقف بايخ مبعرفش أشوف نص الكوباية المليان م الآخر الكوباية بالنسبالي يا مليانة يا فاضية ومن ساعة ما عرفت إن المشكلة دي عندي وانا بحاول أحارب آثارها في حياتي بحاول أشوف نص الكوباية المليان بس الصعب في الموضوع هو إني أعرف أقفش اثار المشكلة دي في حياتي يعني انا لسه حالا أهو مكتشف إن بسبب مشكلة المثالية أنا حارم نفسي من "لحظات الراحة" عشان دايما قافش ومستني الراحة الكاملة اللي هتيجي لما كل مشاكلي تتحل والحقيقة إن الراحة الكاملة دي مش هتيجي أبدا زي ما تقول كده انا بموت نفسي م العطش عشان الكوباية مش مليانة للآخر.
Ahmed Nasser💜.
Ahmed Nasser💜.