"من الطبيعي أنك تنسى المعلومات اللي قرأتها في كتاب، من الطبيعي جدا، أساسًا مش ده الهدف من القراءة، الهدف هوا إدراك المعنى اللي عاوز الكاتب يقوله، والمعنى ده بيتشرب زي كوباية المية الساقعة في يوم حر كده، بيتفهم أقصد وبعد كده بتدمج المعنى ده في أفكارك، فلو بتتكلم عن الكون مثلا، الفكرة مش أنك تحفظ أسماء النجوم والمسافات بينك وبين المجرات، ولكن أنك تدرك عن مدى اتساع هذه الحديقة الكونية البديعة مقارنة بكوكبك الصغير .. وهكذا.
أما عن حفظ المعلومات والأسماء والتواريخ فده بيحصل، بس كمحصلة لقراءات متتالية في نفس الموضوع، بحيث يبقى اسم أو اصطلاح زي "نصف قطر شوارتزشيلد" أو "حد شاندراسيخار" أو "الوضعية المنطقية" أو "التجريبية الجديدة" طبيعي وبيجري على لسانك بعد ما تشوفه أكتر من مرة وفي اكتر من موضوع ومكان أو وأنت بتتناقش مع حد، دخولك لقراءات أكتر في نفس الموضوع بتخلي التذكر أمر بديهي.
فمتقلقش من الناحية دي، الهدف الرئيسي هو إدراك المعنى اللي الكاتب عاوز يقوله، أو فهم الية عمل الشيء اللي بتقرا عنه، كان نجم ملقى به في باطن الكون، أو دماغ فيلسوف ممتع، أو فقط السبب الغريب اللي خللى التيوليب يعمل فقاعة اقتصادية من كم قرن بحيث كان تمن الزهرة الواحدة يساوي تمن منزل كامل! محاولة الحفظ هنا أو التذكر هتعطل العملية دي .. اهدأ واقرأ"
View more
