طاب مسائك ][ أكتب ما يحلو لك لونا تقرأ ••
( نيفين ) من أجدع البنات اللى عرفتها واللى متهيألى إن معرفتها وصداقتها شرف لـ أى حد .. كانت مخطوبة لـ واحد جارها عن حب لمدة سنتين .. بطريقة ما وبالصدفة البحتة ومن خلال ولاد الحرام اللى مخلوش لـ ولاد الحلال حاجة شافت خطيبها وهو بيخونها ! .. خيانة واضحة صريحة مفيهاش أى مواربة مـ أى نوع .. شافته بس هو ما شافهاش .. واجهته واتكلمت معاه .. مقدرش ينكر وكان قدامها زى الكتكوت المبلول ومعرفش ينطق بحرف .. بص لها بنظرة إستجداء وكأنه بيقول : هتعملى فيا إيه وإيه قرارك ؟ .. بدون ما ترد عليه وبدون ما تجيب سيرة عن اللى شافته لـ أى حد تانى بقت تفتعل مشاكل تافهة بينها وبينه قدام أهلها وأهله عشان يتفشكل الموضوع ! .. تلاكيك تلاكيك تلاكيك ( ريحة البرفان بتاعته بتخنقنى ، لبسه بقى مش شيك ، بياكل كتير ، مواعيده مش مظبوطة ) .. حتى لما أهلها بقوا يقولوها ( يعنى إنتى جاية بعد سنتين تقولى الهبل ده ؟ ) .. كان ردها : ( أه انا مجنونة ومش هقدر أكمل ) .. فركشوا الخطوبة .. قِبلت إنها تطلع فـ نظر أهلها وأهله تافهة ومش بتاعت مسئولية وسطحية مقابل إنها ماتقولش السبب الحقيقى ! .. بعدها بـ سنة لما جمعتنا أنا وهى ظروف الشغل وبعدها الصداقة حكتلى .. هى ماكنتش عايزة تأخد رأيى فـ حاجة حصلت وانتهت أكتر من إنها كانت عايزة حد يأكد عليها ويشجعها فـ القرار اللى هى أخدته .. بـ طبعى مش بحب ومش بعرف أزوق الكلام فقلت لها وأنا مفروس منها : طب ع الأقل كنتى فضحتيه قدام أهلك وأهله .. قالتلى : هـ روح أقولهم إيه ؟ .. قلت : إبنكم خاين وكذا كذا ؛ إنتى مش هتتبلى عليه ! .. قالت : لأ ؛ بابا وماما كانوا شايفينه محترم وماحبش أشوفهم بياخدوا فيه مقلب عمرهم .. قلت : طب يا بنتى ما هم هيقولوا ع بنتهم مجنونة ! .. ردت : يقولوا ؛ أنا بنتهم وكبيرهم هيتقمصوا منى شهر ولا اتنين وبعد كده خلاص ؛ وهو ده فعلاً اللى حصل .. سألتها : إنتى مصدقة نفسك ؟ .. ردت : ( جداً ع فكرة ؛ اللى بيخون ده جعان ؛ وانا مش عايزة أرتبط بـ جعان ؛ أنا قررت أستره وسترته )
#Cpd
#Cpd
