- صاحبك إللي عدي معاك مرحلة الصحاب وبقي أكتر من أخ ليك ، مش هيعاملك معامله صديق ، هيكون في موقف خايف عليك ويزعق ليك في النصيحه ويمكن يجبرك عليها بس عمره ما هيخيرك بين شئ وبين صداقتكم ..- موقف تاني هيغير عليك من صحابك التانيين إللي هو بيكرهم ، وعمره ما هيثبتلك ده غير من نظرة عينيه وهو شايفهم واخدين كل وقتك ، وبتضحك معاهم وكأنه مش موجود ..- بيضحي ليك قبل ما تطلب ، بيسندك وأنت بتميل ، بيكون عكازك لو تعبت ، بير أسرارك إللي ميعرفهاش غير ربنا ، بيكون جزء منك بيشعر بيك ، من غير ما تتكلم ، سامعك وشايفك وانت مش قدامه ، عارف بتعاني من أيه وعايز تقول أيه من غير ما توضح ..- غالبًا الشات بينكم من غير إزيك و سلام ، شات كله هزار وتريقه وشتيمه أغلب الأوقات ، حتي سلامكم من غير أحضان من غير عتاب علي أتفه الأسباب ، إنتوا الإتنين مرايات لبعض بتشوفوا فيها تفاصيلكم اللي ميعرفهاش غيركم ..- بيتحملك في كل أحوالك وبيحتوي نوبات إكتئابك إللي من غير سبب ، بيعرف يتعامل مع تقلباتك المزاجيه ، ونرفزتك إللي محدش غيرة بيعرف يتعامل معاك وقتها وأنت عصبي ..- صاحبك ده هو إللي خرجت بيه من الحياة دى ، إللي بينكم مش علاقه سنين وايام وسفر وضحك وكام صورة ، إللي بينكم علاقه روح ب روح ، إللي مقويها ومحافظ عليها هو اللّه ..