ايه مواصفات فارس أحلامك
ولا فارس أحلام ولا فارس أوهام .. بغض النظر عن أي صفات تتمناها الفتيات ف زوجها مثلا من طيبة وأخلاق وحنية وكرم وإلخ ، بس أعتقد إن أهم شئ من ده كله إنه يكون شخص يُعظّم الله في قلبِه ، يراقب الله في حركاته وسكناته ولا يُقدم علي فعل أو تفكير دون أن يفكر هل هذا سيرضي الله والرسول أم لا ؟ ، إذا كان كذلك فتلقآئي هتنتفي عنه معظم الصفات السئية اللي بنسمع عنها وبنشوفها من البخل وقلة الرجولة والعنف وإلخ إلخ لأنه من راعي الله ووضع كل حركة ف حياته في ميزان الله ورسوله بالتأكيد سيكون كل خير هو مايصدر منه فقط ، حتي لو كانت هناك طباع فيه بسبب الأهل أو التربية وخلافه فالدين ومراعاة الله سيضبط هذه الطباع ويروضها ، غير أنه من الضروري أن يكون سوي نفسياً وتفكيره وتعاملاته ومشاعره منضبطه لا إفراط ولا تفريط ، هذا هو من سيحفظ علي ديني .. وهوا في أهم من كده ؟ احنا اصلا موجودين ف الدنيا بنعمل إيه ؟ بنحاول نصل لله ونعبده حق عبادته وننقذ أنفسنا ونثبتها ع الحق وطريق الله لحد ما نوصل بسلام لنهاية رحلتنا إلي الجنّة المرجوة بإذن الله ، طيب حد عايز يشارك في ده أثناء رحلتنا ويساعدنا ويكون خير معين لنا ونعين بعضنا بعضاً فأهلا وسهلا ويا مرحبا ونعمة من الله وفضل ، لكن حد ممكن نحس لوهلة إنه هيفتنّي في ديني ويأثر ع إنقاذي لنفسي يبقي لا مرحبا ولا أهلا ، وده عموما ف أي شخص هيدخل حياة الواحد أصحاب زوج معارف أي شخص ، وطبعاً الزوج أشد تأثير ف دول كلهم لأنه هيكون أقرب حد لينا وحياتنا مع بعض وكل شئ ، فلازم نراعي كويس أنا هاتأثر بمين وهؤثر في مين ، والفتنة ممكن تكون بأي سبب ، سواء شخص لا يراعي الله ولا يهتم بالشرائع مثلا فأنا واحده بواحده هتأثر بذلك ، او شخص مش سوي ومنكد عليا فده برده هيأثر ع استقراري النفسي وهيمنعني عن ممارستي لديني كما أبغي ، وأشياء كثيره ممكن تفسد عليكي حياتك وإنقاذك لنفسك بسبب سوء اختيار الزوج ، وياما شوفنا ناس كتيره جدا افتتنوا ف دينهم وأنفسهم بسبب علاقات مع أشخاص تحت مسمي الحب وبوظو عليهم دينهم وعلاقتهم مع ربنا سواء بسبب التعب النفسي اللي بيحصل من الأذي الناتج عن هذه العلاقة أو بسبب إن البنت غصب عنها بتبدأ تتعود ع أفكار الشخص التاني وبتتنازل عن أفكارها ومبادئها وثوابتها وكل حاجه بتقع وكل ده عشان بتحبه! مأسآة والله ومصيبة وحتي مش لازم تكون العلاقة حرام ممكن زوج وزوجه عادي بس زوج فاسد وراح أفسد حياتها هيا كمان ، لازم نفكر ألف مرة قبل ما ندخل حد حياتنا وخاصة لو حاجه مثل الزواج وهذا النوع من العلاقات اللي الشخص بيتأثر بيها كليا بالشخص الآخر لشدة انخراطه فيه ، يعني يافرحتي بشخص بيحبني ويجبلي دباديب وورود ويقول قصايد غزل مثلا وهو ف نفس الوقت مش مهتم لا بصلاته ولا بصلاتي ولا يراعي ربنا ف أقواله أو افعاله ولا يفكر ألف مرة قبل أن يفعل منكر ويجترأ ع الله ، استفدت انا ايه كده ؟ هقول لربنا إيه يوم القيامة ؟ وبعدين هيربي أولادي مثلا ع إيه ؟ يعني هنفسد أنفسنا وهنفسد أولادنا وبدل ما يبقي ذنب واحد بقت ذنوب وذنوب وإنا لله ، أي حد ممكن يحبك البشر مشاعرهم سهله وموجوده ع طول وفي انجذاب فطري بين الجنسين ففكرة إنك تلاقي حد يحبك سهلة لكن إنك تلاقي حد تآمنله نفسك ودينك مش سهله أبداً ، والموضوع خطير جداً ومهم جدا لإنها نفسك التي ستحاسب عليها فلازم تشوف وتدقق وتُفحص وتُمحر -ايه تمحر دي كمان- ايه اللي حوالين نفسك وايه اللي هيساعدها وايه اللي هيوصلها بسلام للجنّة ف الآخر .. وكبرنا الموضوع برده والله كبرنا الموضوع 🤦♀️
Liked by:
Fatima Ahmed
