بى ام دبليو M5 الجيل الجديد بالكامل الكود بتاعه اسمه ( F90 ) العربية بتنزل بموتور 8 سلندر على شكل حرف V سعة 4400 سى سى مُزود بتكنولوجيا M TwinPower Turbo , الموتور بيولد قوة 600 حصان ( يعنى زيادة 40 حصان كاملين عن الجيل السابق F10 ) و عزم العربية 750 نيوتن.متر بيمكن العربية من التسارع من 0 لـ 100 كم/ساعة فى 3.4 ثانية وده نفس رقم تسارع مرسيدس E63s AMG 4MATIC Plus و بورشه باناميرا تربو S نسخة E-Hybrid وبالمناسبة مفيش عربية سيدان فى العالم بمحرك بنزين ( غير معدلة ) تسارعها من 0 لـ 100 كم/ساعة فى أقل من 3.4 ثانية لذا فـ E63s و M5 و باناميرا تربو اس E-Hybrid هم أسرع 3 عربيات سيدان فى العالم من 0 لـ 100 كم/ساعة ? وده طبعا ً بفضل أنظمة الدفع الرباعى للعجلات الموجوده فى الـ 3 عربيات , نرجع تانى للـ M5 فتسارعها من 0 لـ 200 كم/ساعة فى 11.1 ثانية و سرعتها القصوى 250 كم/ساعة مثبتة الكترونيا ً يعنى بالصلاة على النبى ممكن تجيب اخر العربية فى أول 20 ثانية تقريبا ً ملناش دعوة ? و يمكن طلب العربية مثبتة الكترونيا ً عند 305 كم/ساعة مع حزمة M Driver's Package , العربية نازلة بفتيس ( Gear ) اوتوماتيك من 8 سرعات StepTronic بمتوسط استهلاك للبنزين 10.5 لتر لكل 100 كم , وزن العربية الابتدائى 1945 كجم و العربية دفع كلى للعجلات نظام M XDrive و أخيرا ً بالنسبة لسعر M5 فبيبدأ من 105 ألف دولار ما يعادل مليون و 680 ألف جنيه من غير جمارك و بعد الجمارك سعر العربية هيصل لـ 3 مليون و 790 ألف جنيه مصرى , أبرز منافسين M5 هم مرسيدس +E63s AMG 4MATIC و أودى RS6 Performance و بورشه باناميرا تربو و دودج تشارجر هيلكات و كاديلاك CTS-V , الـ 6 عربيات دولا لو اتعمل ليهم Drag Race مع بعض كل واحد هيطلع من السباق على استقبال مستشفى الدمرداش العام مباشرة ? هيتغابوا على بعض بمعنى الكلمة وللمعلومة أسرع عربية فيهم من حيث السرعة القصوى هى تشارجر SRT هيلكات بسرعة قصوى 328 كم/ساعة ;)