تفتكر/ي استخدامك للنت يوم القيامة في كفة الحسنات ولا السيئات ؟ وإزاي نستخدمه في فايدة لينا ولغيرنا ؟
السيئات للأسف أعتقد أى حد عارف يستخدمه فى الفايدة ازاى بس الشيطان شاطر :D غير ان مواقع التواصل الاجتماعى دى بتسحب الوقت ومحدش واد باله -حدد وقت لاستخدام النت كل يوم -نستخدمه للحصول على معلومات فى مجال الدراسة .. ومشاركة المعلومات دى مع غيرنا -تعلم اللغات والبرمجة بسهولة وبشكل مجانى -تعرف أخبار العالم بسهولة بدل ما تعتمد على الاعلام المحلى لوحده لأنه غالبا هيخدعك .....النت مليان مواقع مفيدة جدا
هو لو واحد حب واحده زميلته وعاوز يوصلها انها تستناه يعمل ايه ؟
لما يتأكد انه واخد القرار النهائى من ناحيته .. ويتأكد من موافقة أهله على الخطوة دى ولو بعد سنين .. ممكن يحاول يوصل لها أو لأهلها لأن كلمته هنا هتكون وعد ملتزم بيه زى ما يكون خاطبها بالظبط
ايه مزايا الجواز من وجهة نظرك اللى ملحقتش تقولها فى البرنامج :D ؟
هاهاها .. محدش يتابعنى فى البرنامج ده يا جماعة كله هلس :D كنا هنعمل حلقة تانية نتكلم فيها جد وأقول رأيى وأسبابى .. والطرف التانى يقول رأيه وأسبابه .. بس هما طبعا مقدروش يجهزو كلام جد كافى ومقنع يقولوه لأن الحجة عندهم أضعف .. ومصيرهم كمان كام سنة كده كده هيتجوزو حتى لو مش مقتنعين به دلوقتى :D ............................................................... المزايا اللى فى دماغى حاليا - بافتراض أنه جواز سليم مستقر بين زوج محترم وزوجة صالحة : كفاية الآية دى كبداية بتعبر عن السكن والطمأنينة والمودة والرحمة بين الزوجين ومن آياته أن خلق لكم من أنفسكم أزواجا لتسكنوا إليها وجعل بينكم مودة ورحمة إن في ذلك لآيات لقوم يتفكرون-كل طرف سند للتانى فى كل أمور حياته .. يساعدو بعض ويتشاركو كل تفاصيل الحياة بدون حرج ..دى المساعدة المادية -كل طرف أقرب للتانى من أى حد فى حياته .. يعرف كل أسراره ويحكيله كل مشاكله ويستحمل عيوبه .. بحيث يقدر يبوح له بكل مكنونات صدره ويوصل لحالة الراحة النفسية .. دى المساعدة المعنوية والنفسية -التشجيع والدفع دايما للأمام .. لما يحس انه مسئول عن زوج وعيال هيحاول دايما يكون أحسن صورة ممكنة .. وشريكه فى الحياة يشجعه ويشد على ايده -يكون ليك تأثير ايجابى فى المجتمع بيبدأ من أسرتك .. تحاول تاخد بايد شريكك للاحسن .. وتربى عيالك على مبادئ وقيم يخدمو بيها غيرهم ويكملو رسالتك فى الدنيا ويكونو أحسن منك كمان -كفاية أنك لما تكبر وتوصل فوق ال 50 وال 60 من العمر تلاقى حد جنبك بتشاركه كل ذكرياتك السعيدة والحزينة ..مش عارف أقول ايه ولا ايه .. دى حياة كاملة :) الوحدة صعبة أوى .. الوحدة ألم وحزن .. مفيش حد بيفتكر ذكريات مهمة فى حياته لمواقف كان فيها وحيد .. راجع كل صورك وذكرياتك كده :)
How was your holiday in general..good things &bad things ? :)
الحاجات الكويسة : -احساس الراحة والأنتخة بعد سنة طويلة ومزنوقة -تدريب شومان -الجيم -شوية قراءات متنوعة -شوية خروجات لطيفة مع ناس ماشفتهمش من زمانالحاجات الباد : -مسافرتش سفرية نضيفة كده مع الاصحاب .. لعدة أسباب .. الأسباب نفسها حاجة تضايق -مكنش عندى اصرار كفاية أتعلم حاجات جديدة زى اللغة والبرمجة -شوية سلبيات تانية معرفتش أبطلها .. مش لازم اتكلم عنها هنا :)