رومانسي ... يعني ايه مش عارف يعني ايه رومانسية :D !
اصل فيه فكرة مغلوطة منتشرة بتعتمد ع المظهر واللى يسمع على أغانى عاتفية ويكتب شعر رقيق يبقى ده رومانسى ومحصلش انا بعتبر النوع ده شتيمة ليا بصراحة :D لو اعتبرناها فى طريقة التعامل بين الزوجين مثلا..ممكن ادى نفسى 60 وممكن نتعلم نزودها اشطة .. :D
على فكرة هو المفروض مش انا اللى احكم على نفسى فى حاجات زى دى...برد عليها بس من باب التسلية الأسئلة دى المفروض تتسأل للناس القريبة منى وهى تحكم عموما ممكن اقول 60
لا مش التالت.. وبعدين الترتيب ده مش المقياس الوحيد للذكاء يعنى...بيكون ليه عوامل تانية منها التوفيق والمجهود :) تخيل معايا واحد عبقرى جدا ومش بيذاكر خالص...ده ممكن يمشى فى هندسة مثلا انما طب محتاجة مذاكرة ومراجعة للمعلومة وتعب كبير
بداية شكرا على كلامك وربنا يكرمك..مذاكرة وتعب طول السنة ان شاء الله محدش بيندم عليها لأن كل معلومة ولها الوقت اللى لازم نحتاجها فيه...الناس الكبيرة بيقولو كده :) بس المذاكرة دى عشان تثبت فى الدماغ ومتضيعش لازم يبقى النفس طويل وتبذل كل طاقتك ومجهودك فى الأيام اللى قبل الامتحان.. ومن هنا هيكون علاج موضوع النسيان ده بحاجتين : التكرار كذا مرة..وان المعلومات تكون موجودة طازة فى الدماغ قبل الامتحان وربنا مبيضيعش تعب حد :)
بمناسبة الطفولة بقا .. ايه اكتر موقف حلو فاكره علي طول من ايام الطفولة :D
ايام الطفولة كلها كانت حلوة... كانت الحياة بسيطة وبنضحك طول اليوم وكل يوم...الا لو حد من اللى أكبر منك زعقلك أو ضربك..تعيط شوية وترجع تضحك تانى بمنتهى البراءة وصفاء النية... كانت الروح طاهرة مش متعلقة بأى مشاغل ولا متاع فى الدنيا..كل اللى تطلبه الضحك واللعب بس .............................................................................................................................. قضيت أول 3-4 سنين فى السعودية..ودول مش فاكر منهم غير ذكريات قليلة جدا للأسف فاكر انى كنت بحب أدخل محلات الملابس وأستخبى تحت الملابس المتعلقة ومحدش بيلاقينى :D فاكر اننا كنا جبنا خروف فى الشقة قبل عيد الأضحى وكنت اتصورت جنبه كان فيه عيل رذل جارنا كل ما يشوفنى يعضنى :D .................................................................. بعد كده نزلت مصر وكنت بقضى معظم اليوم فى الشارع بلعب...وأطلع لهم البيت وهدومى متغير لونها من أى لون كانت عليه للون الأسود :D مش عارف أحكى عن ايه ولا ايه والله... بس مش هنسى انى فى أول يوم ليا فى الحضانة اتخانقت مع واحد وقعدنا نضرب بعض وجت (الميس) بعدتنا عن بعض وقعدت تصالحنا :D فاكر أول سنة أصوم فيها وانا عندى 8-9 سنين مثلا...كنت نازل العصر أجيب كيس شيبسى لأختى الصغيرة من محل جنبنا نزلت أقول لصاحب المحل : عايز كيس شيبسى مش ليا :D مسمعش وسألنى بتقول ايه؟ قلتله : بقولك عايز كيس شيبسى مش ليا برضه مسمعش أو ماستوعبش :D وسألنى تانى وجاوبته نفس الاجابة.. بس المرة دى فهم الحمد لله وقعد يضحك وقالى مانا عارف انك صايم...كنت فاكرك بتسأل عن نوع شيبسى نزل السوق جديد :D ......................................................... فكرتنى بذكريات حلوة كتير بس ماينفعش أكتبهم كلهم...ربنا يجازيك خير :)