ده أنا اللي مش متخيله إن لسه فيه بنات واخده الجواز عن قصة حب سنين طويلة مقياس للعلاقة الناجحه اللي بتدوم وسط كل اللي بيحصل الأيام دي، وشايفين إن الرقص والتنطيط دليل على الاستمرارية ! زمان كنت بقول نفس الكلام لكن حاليا بقيت شايفة إن مفيش حاجه اسمها أفضل مع شخص بالسنين في علاقة بلا مُسمى عشان يبقى اسمه "جواز عن حب" ولا فيه طاقة نضيعها على الفاضي في حاجه مش مضمونة .. أنا عندي سؤال : هو يعني ايه عن "حب"؟ إني أقابل واحد في شغل/جامعة/نادي صدفة وأحس ناحيته بحاجه ومع الوقت الشغف والحماس والإعجاب والتوافق يزيد ويبقي حب؟ طيب ده يفرق ايه عن إني أقابل نفس الشخص في صالون بيتنا قدام أهلي وأهله ويحصل قبول ومع الوقت الشغف والحماس والإعجاب والتوافق يزيد ويبقي حب؟ مين قال إنك لازم تلغي قلبك في الصالونات؟ ومين اللي حدد طريقة الحب؟! والله مافيه مقياس نهائي، ياما ناس بعد قصص حب طويلة في محاكم الأسرة دلوقتي.
بمر حالة غريبة بس مريحة، مُلخصها الزُهد في انتظار أي شيء من البشر عمومًا، تقريبًا حياتي اتقفلت على 4 أشخاص مكتفي بيهم، الباقي مش مستني منهم حاجة، حتى لو حد قصَّر في حقي، بطّلت أعاتب، أساسًا مبفكرش حتى في خطوة العتاب ولا عندي رغبة فيها؛ بتعامل بمنطق التجنُّب في هدوء والاستبعاد.. حالة سلام نَفْسي غريبة، فيه ناس كتير مترجمينها حزن أو قسوة، بس أنا مش حاسه غير إني هادي من جوايا كتير عن الأول، ومش مهتمه.