نصيحة من تجربتك بالحياة ؟
انغمس في الحزن عادي حتى تقع يديك على أسبابه، آه هاتتعب وهاياخد منك وقت، هاتقع وتقوم كتير، بس هاتمسك أسباب قوية تقدر تفسّرها وتعالج نفسك، مش بالضرورة تكون الضحية دائمًا ممكن مايبقاش فيه ضحايا أصلًا ممكن مايبقاش فيه أطراف تانية وأنت واقع في الوهم. في يومٍ ما هاتلاقي الباب اللي هاتفتحه على شخص منك مختلف عن ما قبل، الحزن جزء من تكوينك وطريق لحاجات كتير أغفلتها عينك، هاتشوف نفسك وتفكيرك واللي حواليك بطريقة تانية ممكن هاتكون سوداوية آه، بس عشان أما تفوق تقدر تعرف قيمتها وأد ايه هي كانت وردية. ماتزعلش على اللي فاتك، كمّل بخبرة الماضي، كل مُجرّب قوّي، عِرف حاجة ماحدش عرفها غيره ويمكن لو قالها لحد ماحدش هايفهمها. الدنيا صعبة اوعى تفتكر إنك هاتعيش فيها بنسمة هادية تبقى مغفّل، هي هاتاخدك في ساقيتها زي ما خدت قبلك عشان تعرف قوانينها، ومش هاتعرف قوانينها إلا أما تقع وتقوم.