هتكمل عمرك وحدانى رغم انك حبيتها بجد ومحدش هيعيش للتانى .. ومحدش هيموت ورا حد ! و أهو بكره هتستوعب عادى و تفوق مـ الصدمه و تعرف ان كلنا بنعيش و بنتفارق لكن مش كل الناس بتحن !!
ساب الچاكيت ف الفاترينة بعد ما قاس... ساب الجزمة ف الكرتونة بعد ما داس... حط التلج وبلّع بق و ساب الكاس... ساب حكاياته للى حاكيها.. وفضى حياته م اللى ماليها.. ساب الدنيا بـكل ما فيها.. بعد ما جرّب كل الناس..
لو عايز رأيي أقولهولك .. مع إن المشهد كله كئيب لكن بصراحة ماكنشي غريب !! من فين الصدمة دي جيّالك ؟!! من يوم ما عرفتك ودا حالك طول عمرك بتربّي عيالك وبتلعب لعبة سيب وانا اسيب !! واللعب الليلة على المشاريب وإنت وكل اللي بيشبه لك شاطرين ف الفُرجة ومافيكوش ولا واحد لعّيب !! تستغرب ليه لما بتطلع دايماً خسران ؟!! وبتسقي الكل على حسابك وبترجع تاني تقول ندمان كان مين ودّاك ؟! .. أو مين جابك ؟! بتراهن حتى على شبابك ولا عمرك مرة كسبت رهان وخسارة من بعد خسارة تقلى الموضوع يصبح إدمان والزهر اللي تماللي معاندك دايماً بيدور عكس مصالحك !! لو عايز رأيي أقولهولك .. وأفتح لك قلبي وأصارحك لكن أنا عارفك مهما هاقول هــتـعيش على طول مستني الشمس تشقشق لك من باب مقفول !! ولحد ما شعرك كله يشيب ولآخر يوم .. راح تلعب تاني .. وتخسر تاني .. وتندم تاني .. وتمثل دور المصدوم !!!