العِتاب دا حاجة كبيرة جدًا يا جماعة ومش أي حد يستحق إننا نعاتبه؛ العِتاب محبة فلما تقرر تعاتب حد يبقى المفروض الحد دا بيبادلك نفس المشاعر ويستحق إنّك تلفت إنتباهه، لكن ما ينفعش خالص تعاتب شخص إنتَ أصلًا بالنسبة له ولا حاجة.. لإنّك هتقابل إسلوب بارد وردود كفيلة إنها تخليك تكره نفسك، صدقني مش كُل الناس تستحق العِتاب.
كل سعى وراه خير.. مهما الناس وقفت على راسها محدش هيزاحمك في خير مكتوب لك، ولا حد هيقدر يمنع رزقك، ولا يبعد نصيبك عن طريقك.. إن ما في يد الله لا يوزَّع بقوانين الناس.
قمة العافية وروقان البال إن الواحد ينشغل بنفسه وبس.. إن تفكيره يكون في أحلامه هو، وفي تصحيح غلطاته هو، وإنه يخصص اهتمامه لدايرته القريبة ويكون حريص إنهم يكونوا بخير، وإن وقته يكون ضيق للدرجة اللي متساعش أى فرصة للتفتيش عن باقي الناس وأخبارهم، ونواياهم، وحياتهم.
صاحب القلب الأبيض، والتربية السوية، والأخلاق بنت الناس هو شخص عرف من بدري إن كده كده محدش هيقدر يمس رزقه اللي جايله بأمر رباني غصب عن عين أى مخلوق بالتالي هو أكتر شخص بقى مستوعب إن تمني الخير للغير هو أساس راحة البال.