من المشاهد الجميلة في مسلسل Friends لما روس كان في حيرة من قلبه يختار مين جولي ولا ريتشيل، فاقترح عليه أصدقاؤه إنه يكتب قايمة ويحط فيها المميزات والعيوب اللي شايفها في كل واحدة فيهم علشان يحسم قراره بعد كده. بدأت القايمة بالعيوب، وكانت عن ريتشيل، فقال إن عيوبها: إنها مُدللة بعض الشيء وإن تصرفاتها طايشة شوية، وبعدين سكت وقال إن هو وجولي بينهم اهتمامات مشتركة لأنهم هما الاتنين متخصصين في علم الأحياء القديمة لكن ريتشيل مجرد نادلة (جرسونة) في الكافيه. . القايمة خلصت ودخلوا على عيوب جولي، البنت التانية، سأله صديقه وقاله إيه العيوب اللي فيها؟ في الظاهر مكانش فيها أي عيوب، لكن روس كان عنده إجابة تانية فاجئهم بيها. رد روس وقال جملة واحدة بس: عيبها الوحيد أنها ليست ريتشيل she is not Rachel الجملة دي فيها كل معاني الحب، ممكن نقابل الناس اللي شبهنا، اللي بيننا اهتمامات مشتركة، اللي في نفس مجال دراستنا وشغلنا، لكن لا نتوافق معهم في حين إننا نحب بلا منطق ولا مبرر شخص آخر بعيد كل البعد عن اهتمامنا. جولي هنا كانت البنت النموذجية لشخص زي روس، ده اللي بيبدو من الظاهر، وده اللي الناس بتقوله، لكن الحقيقة إنه اختار ريتشيل، بكل ما فيها من عيوب قبل المميزات. أكيد هنلاقي نقص في اللي بنحبه، زي ما إحنا مليانين نقص، لكن نواقصه بتتركب في قلوبنا بطريقة يستحيل معها أن نجد مثله في أي إنسان آخر. أم كلثوم كانت بتقول: وإن كنت أقدر أحب تاني.. هحبك أنت. فقد يبحث الرجل عن الحب في كل فتاة أو امرأة يقابلها وسيجد الجميلة والهادئة والواثقة والطائشة لكنه لن يجد أبدًا تلك التي استقرت في قلبه بكل عيوبها ونواقصها. كل النساء اللواتي قابلتهن في حياتي كن جميلات وكاملات ومناسبات، لكنهن لسن أنتِ. she is not Rachel