أقسى مراحل الحزن هي مرحلة تجاهلك أنت نفسك للكلام عن زعلك؛ تجاهل سببه إنك مش عاوز ولا قادر ولا مهتم تحكي، مرحلة الزُهد حتى في الفضفضة، بل المصيبة إنك بتمسك نفسك أحيانًا وأنت متعمد قدام الناس تظهر إنك فرحان وبتهزر وبترمي إفيهات.. الحزين اللي بيشكي أمره سهل، ع الأقل هو والقريبين بيعرفوا بحزنه، إنما الحزين المكتوم في نفسه ده اللي يتخاف منه على نفسه... مفيش أصعب من إنك تزهق من حُزنك، وتبدأ تجلد روحك وتعاقب نفسك؛ لمجرد إنك زهقت من كونك حزين، هو فيه أصعب من إنك تستتقل نفسك؟
الشخص اللي بيبعد فجأة عَن كُل حاجة حواليه بيحبها أو متعلق بيها ده بيكون أكتر شخص كان موجود دايمًا ، بس ملقاش لوجوده نتيجة ، حس أن وجوده مش مهم ، فقرر إنه يمشي من غير ولا كلمة ، قرر يحتفظ بكل حاجة جواه لنفسه..
مفيش حد قادر يمثل إنه قوى طول الوقت كُلنا بِلا إستثناء ضُعاف ومحدش قادر يدّعى إنه صلب ومابيُقعش أو ع الأقل ينِخ شويتين ، الحياة جايه ع الكُل ومش محتاجين أكتر من إننا نهون ع بعض ، إلتمسوا العُذر وإسندوا غيركوا ، قولوا كلام حلو بدون مُناسبة للى بتحبوهم وماتستنوش تقولوا ياريت ..