أنا بحب العالم بتاعي يبقى خالي من المنافسة و مبحبش حد في حياتي يبقى عايز ينافسني في شيء أو فاكرني بنافسه ، لو بتعلم حاجة جديدة ف بتعلمها لنفسي مش عشان أبقى أحسن من حد ، لو أنا شاطر فـ حاجة فـ ده فضل من ربنا ثم عشان أنا بحبها مش أكتر ! لو بفكر في شكل معين لحياتي فـ بفكر فيه هيبسطني ولا لا و عمري ما سألت نفسي السؤال بتاع الناس هتقول ايه ولا أنا كدة هبقى أقل من حد ! البساطة دايما سكتي في كل شيء و في حياتي بشكل عام مش طالب غير انه أبقى في وسط الناس اللي بحبهم و بيحبوني و يستمر عندي الشغف لمعرفة حاجات كتير فـ الدنيا عشان ده بيسعدني فعلا و بيخليني أستمتع بالحياة غير كدة أنا بسعى لطرد أي حد من حياتي من بعيد أو قريب بيقارن نفسه بحياتي أو شايف تصرفاتي بتهدده بشكل ما .
لقد تعبت من كل شئ ، لا أعرف لم أبدو منهكاً إلى هذا الحد.... متى وصلنا على هذه الدرجة ؟ والى أين هربت الدهشة منا؟ تلك الأسئلة ، لا يليق بها العويل ، كسبيل للعزاء فالمرء منا يدرك أنه متعب ولكنه يجهل ما الذي يتعبه على وجه التحديد ، كتنهيدة عميقة ، بلا حزن گ صراخ مرعب ، بلا الم.....
- أنا بحب الناس اللي بتبقي عارفه الموقف او النكته اللي بحكيها وتعمل نفسها اول مره تسمعها عشان متكسفنيش .. - بحب اصحاب المحلات اللي مبيقفوش علي راسي وانا داخل اشتري لبس او اي حاجه ويسبوني اتفرج براحتي .. - بحب الشخص اللي اتكلم معاه ميبصش في موبايله ويبص في عيني ويحسسني إنه مهتم .. - وبحب اللي مبيسألش علي مجموعي او تقديري في النتيجه كان إيه .. - وبحترم الشخص اللي لو قولت قدامه معلومه وسط ناس ميفضلش يغلطني .. - وياسلام ع الناس اللي مبتقولكش كل لما تشوفك إنت تخنت قوي ولازم تخس ! .. - وبعشق الناس اللي تشوف بنت او ولد لسه مولود ومتقولش إبنك او بنتك وحشين ليه كده ! - وأفرح بالفلوس اللي الاقيها منسيه في جيب البنطلون .. - وبحب الصاحب اللي ميعاتبنيش بزياده علي قلة سؤالي، وبرتاح للبني آدم اللي يقابلني واكون ناسي اسمه وميسألنيش ويقولي : أنا مين ؟ - وبقدر اوي الابن او البنت اللي مبيقللوش من فهم امهم و ابوهم لمعلومه ع الفيس مثلاً وبيشرحوها بهدوء من غير زهق ونفخ، لانهم عارفين انهم معرفوش الفيس و التكنولوجيا غير بسبب اهاليهم اللي علموهم وصرفوا عليهم عشان يبقوا كده .. - وبعز اوي الناس اللي بتقدر الموقف .. يعني مثلاً تيجي تزورك في الصباحيه وتنقطك لانها عارفه ان الفلوس احسن بالنسبالك من الجاتو والفاكهه عشان تلاجتك مليانه اكل وحلويات .. - اما بقي الناس اللي كلامهم طبطبه دول حكايه لوحدهم .. اللي ميخوفوش الواحده من خطوة الجواز، و ميقللوش من كليه دخلتها .. ديمًا فاتحين بكلامهم باب للخير ومنورين الدُنيا في وشوش معارفهم .. - سيدنا عمر صدق لما قال : البر شيء هين وجه بشوش ولسان ليِّن .. زي ما الفلوس والصحه والعيال رزق .. برضه الناس الكويسين رزق .. ربنا يجعلنا مُرزقين بناسنا .. سواء اللي نرتبط بيهم .. او نشتغل معاهم .. او نخلفهم .. او نصاحبهم .. يجعلهم قاعدين في قلوبنا مش عليها .. يكونوا سبب في إرتياحنا مش في تعبنا