"اللي مستخبي في القلب أكتر"الجملة دي كنت بسمعها دايمًا، لما بركز فيها بحس إنها صح فعلاً، عمرنا ما هنعرف اللي قدامنا بيفكر فينا إزاي، بيحس بـ إيه اول ما يشوفنا، ممكن يمثل عليك إنه بيحبك وبيخاف عليك وهو من جواه بيكرهك وبيتمني لك الشر، يقولك إنه بيحبك وفي نص الهزار يقولك" دة أنا مش بطيقك" وتاخد بالك وتسكت، يضحك في وشك وأول ما تمشي يشتمك.. تبقي بتحضنه بحب وحنية وتبقي خايف ليكون عايز يخلص منك بسرعة، تبقي بتحكيله حاجة حلوة في حياتك فرحان بيها بس مش عارف هو بيحب لك الخير ولا لا، تبقي متضايق وبتفضفض معاه ومتعرفش إذا كان بيدعيلك، ولا بيدعي ربنا يشيلك الهم أكتر.. احساس وحش أنك متبقاش عارف نية اللي قدامك، ومش عارف تبطل تفكير إذا كان مع الدُنيا عليك، ولا معاك علي الدنيا.. وبيحبك وضهر وسند.ربنا يجعل كل اللي في قلب الناس لينا خير، خير وبس.
بالنسبالي اكتر حاجه creative في الشخص هي عينيه، أحيانًا الملامح بتكون متشابهه بين بعض الناس، لكن العيون لأ، لمعة عين الشخص ونظراته العشوائية والمقصوده اللي بتكون مختلفه من شخص لآخر اكتر حاجه بتلفتني واكتر حاجه بحب أركز معاها.. " eyes are the window to the soul" جمله انا عندي ايمان تام بيها، وهي ان العين اكتر حاجه بتتكلم عن صاحبها، بتبرز جانب كبير جدًا من شخصيته ..عن طريق نظراته اللي ممكن تعرفك بسهوله مشاعر الشخص ده تجاهك، طبيعه شخصيته .. إلخ.. وبالنسبالي أجمل حاجه في الشخص هي الدفا اللي ف عينيه حتي لو مكنتش جميله عمومًا وحتي لو ملامح الشخص مش حلوه اوي، لكن الدفا اللي بيغلف عيون بعض الناس ..أكبر سبب بيجذبني وبيلفتني ليهم.♥️
كتير أوي بتلاقينا بنقول للي قدامنا "أنا مكنتش اتخيل أنك تطلع كده" ، أو "أنا كنت فاكرك حاجة تانية " ، أو "أنا أتخدعت فيك ".. وبنرمي مسؤلية خداعنا في الناس وصدمتنا فيهم عليهم هما ، ولكن في حقيقة الأمر هي مسؤليتنا احنا فقط ، هما مالهمش دعوة بالصورة الحلوة اللي رسمناهالهم في خيالنا أو هما باعهولنا واحنا أشتريناها وصدقناهم ، هما مالهمش دعوة بأفتراضنا فيهم الحب أو حسن المعاملة أو الجدعنه أو رد الجميل أو الخوف علي العشرة ..الخ ، كل أفتراضاتك وحسن نوياك تخصك لوحدك ! ، ماتقولش المفروض كان يعمل لي كذا ، أو أستنيت أنه يعاملني بطريقه معينة ، أو أستنيت منه يعمل كده.. توقعاتك للناس وتصرفاتهم وردود أفعالهم في الغالب دايما هاتصدمك وتحبطك وتخذلك لأنك بتفترضها بناء عليك أنت و علي تربيتك وأخلاقك وثقافتك و حسن نيتك ومعاملتك معاهم ، ولكن الناس هما مش أنت و مش صح أنك تقيس الكون كله بدماغك أنت ورؤيتك أنت ومفاهميك أنت.. عشان ماتتصدمش.. مش كل ولاد الناس ولاد اصول .. كلنا ولاد ناس بس مش كلنا ولاد اصول.🚶🏻♀️
انا بحب عمرو دياب مش بس عشان صوته حلو وعبقريته فى الاداء , بحبه عشان " حبوب المهدئات " اللى بيرميها وسط أغانيه , عباره عن كلمات كده كأنها بتيجى على الوجع فبتهديك وتريحك وكأنه بيقولك " ريلاكس اهدى انا فاهمك وحاسس بيك "💙زى مثلا مقطع من اغنيه " مش كل واحد " لما قال مش كل واحد جنب مني عزيز عليا ولا كل غايب عن عينيا هقول بعيد في ناس ناسيهم قلبي وهما قصاد عينيا وناس مجرد افتكرها بكون سعيد " .. وفى اغنيه " انا مش انانى " لما قال " عايز الحقيقة علشان مكانك اتملى عينيك وقلبك غيرانين وبقيت في ضيقة " .. وبعدها بشويه راح وقال .. " ايامنا راحوا مقدرش اقولك غير كده ولا ينسى قلبي بكلمتين تعبه وجراحه , مين اللي قالك الحياه وقفت في يوم على اللي راحوا " ..💙اغنيه " ساعه الفراق " دى لوحدها كانت فى قمه الابداع معرفش ازاى جاب الوصف الدقيق ده فيها خصوصا لما قال " كلنا بنقول هننسى والفراق مايهمناش , نفترق وتعدى فتره واحنا لسه مانسناش , كل واحد قاله كلمه قال يارتنى ماقولتهاش ...💙 بتحس عمرو دياب بيحكي حقائق علميه ثابته مش مجرد كلمات💙
بالنسبة ليا اكتشفت أن أى حد حنين قادر بسهولة جدًا يكسبنى في ثانية، الحنّية عندى تغلب أى صفة تانية علشان مُستحيل مُستحيل هتلاقى حد حنين وحش؛ حتى وقت قسوته مابيعرفش يقسى علشان ببساطة مش بيهون عليه. أكاد أجزم إن الصفة دى اكتر حاجة attractive فى الانسان. شكرًا لكل هين لين سهل قريب من الناس، قادر يحافظ على حنيته وسط عالم قاسي. 💖
الواحد بيبقى منعزل مع نفسه وفي لحظة هوجاء بتدب فيه روح إجتماعية عارمة فيدخل يكلم كل الناس بإنطلاق قد يصل إلى إنه يتك تك على بيت أم سليمان يسألها زوجك وين كان بمنتهى الفضول والأريحية والرغبة في الرغي، ثم في منتصف الاسترسال يرجع لمود "أنا خاصمت الشوارع" فجأة فيُدرك أنه محتاج ينهي الحوار قبل التهور باتفاق على معاد خروجة أو الدخول في حورات طويلة.. فيتأرجح ما بين "حاسس إني اجتماعي سيكا"، وبين "أنا عيل صغير والله سلام"..😂🚶🏻♀️
اسوأ حاجة في الارق هو انك من كتر التفكير بتتعب. بتحس بهبوط من كتر ما مخك عمال يقلق من حاجة على الاغلب مفيش في ايدك حاجة تعملها. بتوصل لحالة من الزهق مش من اللى مضايقك، بس من مخك. من نفسك انك سامح لمخك يعمل فيك كدا. و احساس العجز امام قدرة مخك على التفكير الهوسي صعب جدا الحقيقة.