يعطيك العافية يخوي،بدي نصيحتك، كيف بدك تتعامل مع ولد عمرو ١٧-١٦سنة بحاول يستفزك بشغلة بغض النظر ايش هي بس من زمان وبضل يحكي فيها ويضحك، مع انو انا شغال بمحل وجاي اترزق وفهمك كفاية وعملت كثير مشاكل،واخر فترة بدي اختصر المشاكل لانه كثرة مشاكل يمكن انطرد بسببها فبدي حد للاشي هاض وبدي نصيحتك من اخ لاخوه
الله يعافيك ، صديقي اولا هاي الشخصية السامة بدك تعرف كيف تتعامل معها واول شي لازم تعملو تحط حدود لعلاقتك معو لانو نظرتو دايما حتكون سلبية وغبية ، ثانيا التجاهل واعصابك لازم تكون باردة تجاه كلامو لانو اذا خليت اي شي بحكيه يستفزك انت صرت هدف الو حاول تتجاهلو قدر الامكان لانو اذا بدك تنزل عقلك لعقلو حتصير بمستواه وانت عقلك اكبر من هيك خلي جواباتك دايما الو باردة وانو ككلام بحكيه ما حيأثر عليك او يعمل ردة فعل الك ، ثالثا حط صاحب المحل بالصورة واشرح الوضع الو وانك شخص جاي تترزق واكيد برضو صاحب المحل لازم يحط الو حدود ، رابعا اوعك تحاول تفتح معو مواضيع او تعطيه مجال يتكلم معك طالما انت مطنشو وسايبو يعوي زي الكلب رح يسكت بعض المواقف بدك تسيطر فيها على اعصابك ، خامسا ركز ع الحل مش المشكلة واكيد هون لازم صاحب المحل يدخل او شخص الو سلطة بالمحل يتحكم بتصرفاتو لانو الشخصيات الي زي هيك بدور فقط ع المشاكل واسهل شي عندو يحط اللوم ع الي قبالو ويوديك لتعمل مشكلة ، لا تفكر انو شخص مستفز يعني قوي او بنقدرش عليه حسسو انو كلامو مجرد كلام ما الو قيمة هاي شخصية جدا ضعيفة وبحاول يخفي ضعفو بهاي الحركات ولا تخليه يحاول يهدم استقرارك النفسي لانو عامل مهم تكون محافظ عليه ، احترامك لذاتك ولقيمتك اشي مهم وما تخلي حد مهما كان يقلل منهم
Liked by:
Abrar R .Alkawaldeh