شلون اترك كلام الناس ورايهم على جنب؟ الحمدلله عندي رسالة واضحة ومااهتم لكلامهم الا وقت احباطي ؟
"إن تطع أكثر من في الأرض يضلوك عن سبيل الله إن يتبعون إلا الظن وإن هم إلا يخرصون". تأمل الآية اذا بدا لك كلام الناس صحيح، وتوجه للحب وقت احباطك، احنا ما نلتفت للناس الا اذا قل الحب.
انا أحرجت نفسي قدام شخص وتصرفت تصرف غير لائق وهذا الشخص ماكان متعاون فشلني اكثر مالحل ميف أعيد تقديري لذاتي امام هذا الشخص ؟
ياخي ليش يفشلوننا اكثر؟ ليييش؟ :) ماعليه، حلك عندي، اذا شفته قريب عيد نفس الحركة او تدري شلون؟ سولك شي اعبر بعد، ليما تتحطم صورتك بالكامل جدامه، وبعدها روح احتفل بحريتك! مهما كان الشخص غالي عليك لا تعيش داخل إطار الصورة اللي حاطها لك، هذا سجن، والمشكلة لا انت راضي، ولا هو راضي. وترا اذا تستمد تقديرك لذاتك من آخرين راح يقيدونك، وبعدين لابد ما يكسرون فيك، مهما كانوا خوش اوادم، استمده من ربك ومن نفسك فقط. وفشل نفسك، ترا هذي شجاعة من نوع خاص جدا :)
من قرأت مدح الدكتور صلاح لك وانا معجبة في شخصيتك وأحس ان في حسابك طاقة قوية مو أي أحد يقدر يسوي لك فلو :) .. بس شلون هالوعي ارتفع ماشاء الله وأتمنى لك السعادة؟
شكرا لذوقك، ارتفاع الوعي بشكل عام قرار شخصي، مش هبة، او مكافأة لاجتهادك. ادخل تجارب حقيقية بعيدا عن المفاهيم والنظريات وستعرف ما اعني.