انا محتاج حد يفهمنى .. حد يستوعب انى مش دايما ببقى عارف أتكّلم .. و انى متقلب المزاج جداً لدرجة انى ممكّن ابقى بضحك و أروح معيط فجأه .. و انى بتعشم جداً فـ الناس اللى بحبها .. ولما بحب بقع على وشى .. و بحب بكل طاقتى .. و انى برضه ليا طاقه .. مبقدرش أتحمل " الغياب الطويل " .. و "الأحضان الروتينيه " و " التراكمات ".. و انى ساعات بحب أبقى لواحدى .. و انى بحب المزيكا قد ما بحب صحابى .. و انى ساعات قلبى بيتقبض من غير سبب .. فبفضل مأريف طول اليوم .. و انى طول الوقت ببقى عايز أشوف الناس اللى بحبها .. و انى فعلا ممكن معرفش انام لو حد زعلان منى ..
يقول ابن القيم رحمه الله "لاتحمل هم الدنيا فإنها لله. ولا تحمل همَّ الرزق فإنه من الله. ولاتحمل هم المستقبل فإنه بيد الله. فقط احمل همًا واحدًا كيف ترضي الله، لأنك لو أرضيت الله، رضي عنك وأرضاك وكفاك وأغناك"
اكتر حاجة بتمناها و بطلبها من ربنا بجد ، ان الواحد ميعديش العُمر بيه وهو لسه تايه مش عارف إيه المكان المناسب اللي المفروض يبقا فيه ومين يبقا معاه .واتمنى إن ميجيش يوم من الأيام أندم فيه لما أحس إني المفروض مكونش هنا ولا فـ وسط ناس مش شبهي لمجرد ان الظروف بتحكم على البني آدم حاجات كتير ميكونش حاببها . اللهم اختارلنا الخير و ارزقنا الرضا به .
فكرة انك تبقي عارف عيوبك وبتحاول تغيرها او علي الأقل تبقي معترف بيها احسن بكتير جدا من العناد وإنك تحاول تبان كويس وتمثل المثاليه بحترم الناس اللي بتتعامل بطبيعتها من غير ماتتصنع شخصية حد تاني وصدقني انك تعترف بعيوبك وتحاول تصلحها او تقلل منها دي حاجه عظيمه لكن متبقاش منافق .
أنت ممكن تخسر حد بمكالمة أنت زعلان فيها ، ممكن إنسان يشوف انك خيبت آماله فيك لأنك كنت out of mood فـ وقت معين ، ممكن تظهر كـ شخص بايع لأنك معندكش طاقة تتكلم أو تتمسك . ممكن تفقد إنسان غالي جدا عندك لـ مجرد إنك كنت تعبان فـ فترة فـ قصرت .On the other side . ممكن ترتكب أمر سئ وتلاقي حد جمبك بيقولك انت مش بالسوء دا وانت من جواك كويس انا عارفك بجد . ممكن تتهرب من شخص وتلاقيه باعتلك مسدچ يقولك فيها إنك وحشته عادي حتي وهو شايف تهربك منه بس حطلك عذر إنك تعبان او مش قادر تقابل حد ، ممكن صديقك المفضل تبطل تكلمه فـ فترة تعب وتلاقيه باعتلك يقولك انا مستنيك اما تقدر تتكلم . ممكن تغلط فـ شخص وتتعصب بس اول م تعتذر يسامحك لإنه عارف إنك كنت تعبان وقتها وإن مش قصدك .اللي عايز يحطلك عذر هيحطلك مليون عذر واللي عايز يشوفك غلط هيشوفك غلط حتي لو كنت بتنقذ حياته .أنت مش هتقدر تتحكم ف نفسيتك طول الوقت ، بس هتقدر تتحكم فـ الإطار المحيط بيك وتنقى ناس هتبقى عليك . مش صح نبقى بنطلع عصبيتنا ع حد ولا بتنرفز ع حد ولا بنيجي ع حد عشان تعب فينا لكن بنسبة 70% غصب عننا فـ مرة تعبنا مش هيخلينا قادرين نبقى نفس الشخص اللطيف . وقتها بس هتعرف مين مش هيستغني عنك رغم كل حاجة ومين هيستناك تغلط عشان يبعدهل ستحبني رغم كل ندوبي ؟ رغم أني صديق سئ فـ معظم الأوقات . رغم مزاجي المتقلب ؟ هل ستحبني عندما لا أكون بنفس الوجه الذي عهدته ؟! .