لما بكون مخنوق بسمع قران بصوت الشيخ محمود علي البنا او الشيخ عبدالباسط ، بعشق سماع قران الفجر فاذاعة القران الكريم وبعدها التواشيح والمدائح النبويه قبل اذان الفجر حاجه عظمه ❤ ، اقرب سور القران لقلبي سورة يوسف ويسين والبقره ،،الشيوخ اللي بحب اصواتهم فقط مش كل اللي اعرفهم :- محمود علي البنا عبدالباسط سيد سعيد الحلفاوي ادريس ابكر عادل المراغي هزاع البلوشي ناصر القطامي الدوسري العفاسي خالد الجليل ماهر المعيقلي اسلام صبحي فارس عباد
بالتوفيق ربنا يحبر خاطرك واهلك وكل طلاب الثانويه ، بس حابب اضيف شي ؛ ان الله لا يضيع اجر من احسن عملا ، لما ربنا يكرمك وتجيبي مجموع هندسه قولي الحمد لله وخليكي بيقين ان دا فضل من ربنا ودعا الوالدين اخر حاجه مجهودك 😊 لو كانت النتيجه غير هندسه فدا برضو فضل من ربنا ودعا والدين لان لو ربنا كاتبلك الخير في هندسه هتدخليها لو الخير في مكان غير هندسه فاختيار ربنا الطف وارحم من اختيارك ، معايا صحاب ليا منهم اللي كان علمي علوم ومنهم اللي كان رياضه ومدخلوش طب ولا هندسه زعلوا وطموحاتهم اتهدت ودخلوا كليات غير اللي اتمنوها ، مع ان مجهودهم كبير وكانوا معانا من الاوائل ، حكمة ربنا ان صحابنا دول كل واحد فيهم بقي الاول علي دفعته ولو مكنش الاول بيبقي في ترتيب الدفعه ، ودلوقتي علي منهم علي اعتاب التعيين معيد في الكليه اللي هو فيها ، ربنا بيكتب الخير اللي يرضينا ويطمنا مش اللي احنا اختارناه ، اختيار ربنا ايا كان فيه رحمه ولطف خفي لا يعلمه الا هو سبحانه ، فاول كلمه بعد النتيجه قولي الحمد لله برضا قلب ،
انا محتار بين عروستين واحده انا اعرفها وشيك في لبسها ومكياجها وواحده امي اخترتهالي بس مش بتحط مكياج ولا مهتمه ببشرتها ولا شياكتها والاتنين مقبولين في كل حاجه بس ده هو الفرق الوحيد دي مهتمه ودي مش مهتمه؟
متحتارش بس انا لو في موقفك هختار اللي مبتحطش مكياج وفكك من الشياكه وبتاع اختار الحشمه ، واكيد وضع بيتك هيختلف عن الخارج والله اعلم يعني هتشوف شياكه ونزاهه لوحدك محدش هيشاركك فيها لو بنظره علي عكس اللي بتحط ميكاب وبتهتم بمنظرها ، حتي لو الاتنين لبسهم فضفاض وواسع اختار الاكتر حشمه
لو انا بدرس لغة عربية و مش عارفه ابقى متمكنه ازاى اصلا
دراستك اللغة العربية هتسمحلك انك تختمي قراءة القران كتير جدا ، اسمعي القران تجويد وانتبهي لمخارج الكلمات وافضل الشيخ الطبلاوي او عبدالباسط عبدالصمد ، اقراي القران فتره كل يوم بس بتركيز في التشكيل ، اقراي قصائد والفيات كتير ، ادرسي قواعد نحوية وتعانلي انك لسه في ابتدائي او اعدادي وابدائي من الصفر هتكوني باذن الله متمكنه جدا ، واستغلي دا فالاجازه حتي ع اوقات بسيطه
بتعملوا ايه عشان تخرجوا من جو الحزن والكآبة دا قولوا أفكار غير الصلاه وقراء القرآن دمتم فى سعادة❤
مفيش غير الوضوء والدعاء وسط الدموع وسورة يوسف ، هنا القلب بيتولد من جديد وكانه في احضان الملائكة والله ❤ بيسعدنا ناس بتحس بينا منغير كلام بيبقي عاوز ينتشلك من همومك واحزانك ، ع سبيل المثال دا السنه اللي فاتت الترم الاول كنت عايشه في زعل واكتئاب وحزن بسبب تعب والدي ودخوله العمليات مرتين مكنتش عارف ازاكر وظهرت النتيجة دفنتني في الزعل والحزن ، طبعا صحابي كتير كانوا متابعيني بس اللي لمس قلبي واحد من اعز صحابي قالي " بالله مش عاوزك تزعل خد من فرحتي وهون علي نفسك ولو انت مش باقي علي نفسك احنا عاوزينك وسطنا انت ضحكتنا " عمري ما انساها الكلمات دي ليوم الدين كل ما افتكرها احس اني مديون لصحبي دا ❤❤❤ كان ابويا داخل غرفة العمليات وانا قلقان عليه نفس الصاحب بعتلي وقالي قرأت جزء من القرآن بنية شفاء والدك والله بكيت لما قراتها ❤❤
انا مدخلتش احياء وحيولوجيا ولا فيزيا ولا كيميا ، ف انا جتلي الفكره ان ليه محولش وابقي رياضه ويبقي عندي طموح يساوي كلية طب ميقلش ، بعت فاكس لوزارة التربيه والتعليم بوضعي ينفع احول ولا لا ردهم كان طالما مدخلتش احياء وجيولوجيا ينفع ، بعد ما ظهرت النتيجة ناس واساتذه بالعبل جايين يواسوني عشان مدخلتش طب وكدا بس لما عرفوا اني جبت مجموع هندسه كانت صدمه ومفاجئه هزت كل الوسط اللي يعرفني 😂😂 انا لو فضلت ساجد لربنا حمدا وشكرا علي المعجزه دي والله مش هيكفي ❤❤