ضحكت من قلبي في مرة لما اتقالي إني بياع … كُنت من النوع العبيط اللي بيخاف على زعل الناس ، ماشي يواسي الكُل ويساعد ويعين ، بيحط نفسه مكان غيره وبيقدرهم وبيراعي مشاعرهم ، بفكر في غيري باستمرار ، بخاف من خسارة الناس وبخاف من البُعد وبتمسك لاخر نفس فيا ، وفي الاخر كسبت ايه ؟ ولا لقيت حد جمبي وقت ما احتاجت لإيد ، ولا حد فكر فيا في يوم ، ولا حد حاول يتمسك بيا وكان باقي عليا ، فلو أنا بياع علشان اختارت نفسي وكرامتي وبقيت بعامل كل واحد على حسب ما بشوف منه ، فعادي أنا بياع ..
أنا قدرتي على التخلي بتبهرني في كُل مرة والله ، أنا على قد ما بالي طويل وبصبر وبعدي ، وعلى قد ما بستحمل وبتجاوز وباجي على نفسي علشان المركب تمشي ، على قد ما بسيب وبكّره ، لمجرد إني أحس إنك ما تستاهلش الحلو اللي جوايا ولا تستاهل تقديري ليك .
والله اللي عايز يفضل في حياتك هيفضل واللي شاريك هيتمسّك بأي أمل ويفضل لازق فيك، واللي بيحبّك بجد أخر حاجة مُمكن تخطُر على باله إنّه يمشي، فما تقعُدش تفرُك وتفرهد نفسك عشان تحافظ على وجود الناس في حياتك .. صدقني ما بتمشيش كدا، اللي عايز يفضل هيفضل واللي بايع هيفضل بايع مهما تعمل عشانه.