لا يوجد كذبة أكبر من إغلاق السنين وانتظار بداية سنة جديدة، لا يوجد سنة تأتي أجمل، نحن من نصبح أجمل أو أقبح، نحن من نغير ايامنا، مشاعرنا التي تغيرها رياح الواقع، الحب، الوداع، الاشتياق، نحن الذين نختار أن نعقد صفقة جديدة مع الأيام، السنوات لا تغلق معها الألم ولا تضمن لك السعادة
الظروف بتكشف الأصحاب سنة هتلاقي نفسك وقعت في مطب علاقة بَعَدتك شوية عن أغلب الناس.. هيبعد عنك الاصحاب المزيفين ويفضل الاصحاب اللي بجد سنة تانية تدخل فيها في بداية شغف جديد ياكل نص وقتك هتلاقي نفسك بتبعد عن اللي مش قادرين يفهموك وتفضل مع اللي بيحبوك بجد شغل جديد بمواعيد صعبة هيبعد عنك الناس اللي مش بيقدروك ويفضل معاك اللي عايزين يستحملوك تغيرات في وجهات نظرك ومعتقداتك هتنسف من حواليك ناس كتير كانوا قريبين عشان شبهك بس.. وهيفضل لك الناس اللي بيحبوا روحك مش اللي حواليك سنة ظروفك تخليك نِكَدي.. هيبعد عنك بتوع الفرفشة ويفضل بس اللي بيحبوا كل احوالك عشان كدة.. كل ما الظروف في حياتك بتختلف وتخليك انت كشخص تتغير.. كل ما تعرف حقيقة اللي حواليك.. واللي مكمل معاك الرحلة بكل التقلبات دي.. ده مش صاحب.. ده أخ
العينين بتكشف كل حاجة.. مستحيل حد قلقان مايكونش التوتر باين على عينيه.. مستحيل حد بيحب مايكونش باين من ارتباك على عينيه.. مستحيل حد بيحقد مايكونش طالع السواد في عينيه.. اللي بيشجعك ضحكته ليك بتكون من عينيه.. الأهل ونجاحهم بولادهم بيبان من العين.. والعزاء الحقيقي من المفتعل بيبان في العين.. حتى أساس الصداقة بتبان من راحة حركة العين في وجود الصديق لو عايز تعرف حقيقة حد ناحيتك.. ماتسمعش كلامه.. ركز في عينيه
مافيش أي عيب لو حسيت في يوم بالانسكار.. ده مش معناه إنك ضعيف ولا اتغلبت.. مافيش أي عار إن مشاعرك تتجرح وتحس بضعف.. مافيش أي كسوف من إنك تبكي في أوقات من كتر ما بقيت هش في موقف من المواقف الموضوع مايخصش راجل وست.. صغير او خبرة.. أول كسرة أو الكسرة رقم ١٠٠..الشعور بالانكسار شئ طبيعي.. هو في الواقع اللي مش بيتوجع يبقى إنسان مش بيحس واللي مش بيحس شخص صعب لنفسه وللي حواليه أكتر بكتير من اي حد بيتألم ويتكسر. الكِسرة مش عيب ولا بتقلل مننا.. ومافيش حد فينا يستاهل يستخبى عشان مكسور.. كل الناس حوالينا بتعاني.. فيه بس شوية ناس بتحس اكتر من ناس.. وناس بتعرف تِجَمد قلوبها اكتر من ناس.. بس مافيش حد فينا حياته مثالية ولا من جواه مش متعور من حاجات كبيرة.. المهم في الموضوع ده احنا نعرف نختار نحكي لمين بدل ما نحكي لحد يزود علينا كسرتنا.. والأهم إننا كلنا نحاول نخف على بعض شوية